Gaur deklaratuko du Clara Rangelen ustezko hiltzaileak
Atzo hasi zen Donostiako Lurralde Auzitegian Clara Rangelen ustezko hiltzailearen kontrako epaiketa. Epaiketaren lehen egunean deklaratzekoa zen Rangelen bikotekide izandakoa, baina azkenean herri epaimahaia osatzen eman zuten goiz osoa, eta beraz, gau...
Atzo hasi zen Donostiako Lurralde Auzitegian Clara Rangelen ustezko hiltzailearen kontrako epaiketa. Epaiketaren lehen egunean deklaratzekoa zen Rangelen bikotekide izandakoa, baina azkenean herri epaimahaia osatzen eman zuten goiz osoa, eta beraz, gaur deklaratuko du.
Epaitegiaren kanpoaldean, berriz, protestak entzun ziren: Errenteriako Berdintasun Kontseiluak eta talde feministek deituta, elkarretaratzea egin zuten “justizia” eskatzeko.
Udalak ere gertaera gaitzetsi du adierazpen instituzional baten bidez, eta herrian jarrera matxistarik ez duela onartuko adierazi du, “are gutxiago emakume izateagatik pertsona bat hiltzea”.
Epaiketak, gainera, “herrian indarkeria matxista egunero pairatzen duten emakumeak daudela” gogorarazten duela esan du udalak, eta guztien inplikazioa ezinbestekoa dela hori gainditzeko.
Fiskaltzak 35 urte eskatu ditu
Gipuzkoako Fiskaltzak 35 urteko kartzela zigorra eskatu du Rangel ustez hil zuen gizonarentzat. Rangelek beste harreman batean izandako 16 urteko semea hiltzen saiatzea eta haren anaia erasotzea ere leporatu dio Fiskaltzak, “bi semeen aurrean, eta bere burua defenditzeko inongo aukerarik gabe”.
Defentsak, berriz, absoluzioa eskatu du, akusatua alkoholaren eta kokainaren menpe zegoela argudiatuta.
