Javier Peral: “Hiru urtetan Touring Hirugarren Mailan uzteko lan egingo dut”
Duela ia urtebete presidente kargua hartuta helburu argi bat zeukan Javier Peralek (Errenteria, 1947) aurten taldea Erregional Ohorezko Mailara igotzea. Esan eta egin: larunbatean Euskaldunaren kontra 5-0 irabazita, duela lau urte galdutako mailara bueltatuko da. Zorionak! Eskerrik asko. Egia esan, oso pozik gaude, lau urte igo gabe egonda eta… Ospatu duzue dagoeneko edo beste egun baterako utzi duzue? Oraindik ez. Denboraldia bukatzeko partida bat falta zaigu, larunbat honetan Usurbilen kontra jokatuko dugu, eta hori bukatzean egingo dugu afaria. Uztailean urtebete egingo duzu presidente karguan. Orduan aurtengo helburu nagusia mailaz igotzea zela aipatu zenuen. Etxeko lanak ongi egin dituzuen seinale. Oso ongi egin ditugu, bai. Horrez gain, oso gustura nago, inguruan daukadan jendeak oso ondo lan egiten duelako. Aurten ondo egin dugu lan, eta ea datorren urtean ere hala egiten dugun. Lau urte egin ditu Touringek Erregional Preferente Mailan. Zergatik lortu du igoera aurten? Ni presidente bezala ahalik eta ondoen lan egiten ari naiz. Bestetik, aukeratu ditugun jokalariak ere ondo ibili dira. Horietako batzuk joan egin ziren lehen, eta orain batzuk berreskuratzea lortu dugu. Gainera, beste denboraldi baterako ere Touringen jokatu nahi duen jendea erakartzen ari gara orain. Talde ona aterako dugulakoan nago. Lehen taldearen helburua lortu duzue, baina beheko kategorietan [...]
Duela ia urtebete presidente kargua hartuta helburu argi bat zeukan Javier Peralek (Errenteria, 1947) aurten taldea Erregional Ohorezko Mailara igotzea. Esan eta egin: larunbatean Euskaldunaren kontra 5-0 irabazita, duela lau urte galdutako mailara bueltatuko da.
Zorionak!
Eskerrik asko. Egia esan, oso pozik gaude, lau urte igo gabe egonda eta…
Ospatu duzue dagoeneko edo beste egun baterako utzi duzue?
Oraindik ez. Denboraldia bukatzeko partida bat falta zaigu, larunbat honetan Usurbilen kontra jokatuko dugu, eta hori bukatzean egingo dugu afaria.
Uztailean urtebete egingo duzu presidente karguan. Orduan aurtengo helburu nagusia mailaz igotzea zela aipatu zenuen. Etxeko lanak ongi egin dituzuen seinale.
Oso ongi egin ditugu, bai. Horrez gain, oso gustura nago, inguruan daukadan jendeak oso ondo lan egiten duelako. Aurten ondo egin dugu lan, eta ea datorren urtean ere hala egiten dugun.
Lau urte egin ditu Touringek Erregional Preferente Mailan. Zergatik lortu du igoera aurten?
Ni presidente bezala ahalik eta ondoen lan egiten ari naiz. Bestetik, aukeratu ditugun jokalariak ere ondo ibili dira. Horietako batzuk joan egin ziren lehen, eta orain batzuk berreskuratzea lortu dugu. Gainera, beste denboraldi baterako ere Touringen jokatu nahi duen jendea erakartzen ari gara orain. Talde ona aterako dugulakoan nago.
Lehen taldearen helburua lortu duzue, baina beheko kategorietan ere mailaz igotzea zen zuen asmoa.
Gazte Mailan bi talde ditugu, A eta B. A mailakoak dagoeneko igo dira Ohorezko Gazte Mailara. B mailakoak, berriz, Gipuzkoako Koparako finalaurrekoa jokatzen ari dira. Ohorezko kadeteak ere igoerarako borrokan egon dira, baina dagoeneko ez daukate igotzeko aukerik. Lehen Erregionalean, berriz, aukera galdu dute Erregional Preferentera igotzeko. Neskek kopako finalaurrekoa jokatuko dute aste honetan. Oso pozik gaude guztiekin. Gauzak ongi egin ditugu.
Lehenengo taldea Ohorezko Mailara igo da. Nola ikusten duzu taldea beste maila altuago batean jokatzeko?
Kirol zuzendariak eta entrenatzaileak diote lasai egoteko, erdian egoten bagara nahikoa dela. Hori bai, nire asmoa da hemendik hiru urtera Touring Hirugarren Mailara igotzea. Nik presidente kargua hemendik hiru urtera arte daukat, eta ez dakit lortuko dugun, baina nik Touring Hirugarren Mailan uzteko lana egingo dut.
Hurrengo denboraldirako ari zarete jokalari berriak bilatzen?
Ari gara jokalariekin hizketan. Nire ilusioa da lehen joandako Errenteriako jokalariak berriro bueltan ekartzea: batzuk Pasaian jokatzen dute, besteak Oiartzunen… Nire asmoa da horiek Errenteriara ekartzea. Beste lau mutil dauzkagu Antiguotarran jokatzen, eta lauk bukatzen dute aurten gazteetan, eta baiezta genezake horietatik bi etorriko direla Touringera, eta beste biengatik negoziatzen jarraitu beharko dugu.
Horrez gain, igoerak bazkide berriak ekarriko dituela uste duzu?
Bai. Jadanik hasi gara jendearen eskaerak jasotzen. Orain 600 inguru bazkide ditugu, eta gure helburua 1.000 bazkideetara ailegatzea da.
