Lau Haizeta parkean zuhaitzak landatzeko akordioa sinatu dute
Herribus garraio enpresak eta Errenteriako Udalak akordioa sinatu dute Lau Haizeta parkean zuhaitzak landatzeko. Horretarako, Herribusek 3.000 euro inbertitzeko konpromisoa hartu du. Zehazki, bertako espezietako zuhaitzak landako dituzte udalarena den ...
Herribus garraio enpresak eta Errenteriako Udalak akordioa sinatu dute Lau Haizeta parkean zuhaitzak landatzeko. Horretarako, Herribusek 3.000 euro inbertitzeko konpromisoa hartu du. Zehazki, bertako espezietako zuhaitzak landako dituzte udalarena den hektarea bateko eremuan. Ostiralean izenpetu zuten akordioa Jon Txasko Garraio zinegotziak eta Paco Ruiz Herribuseko administrariak.
Ingurumena babesteko lankidetza hitzarmena dela zehaztu zuten sinatzaileek; izan ere, herritarren mugikortasuna hobetzen saiatzeaz gain, iraunkortasuna sustatzeko ere ahalegin bateratua egiten ari dira bi aldeak.
Hitzarmena arrazoitzeko, baso politiken ondorioz sortutako higadura arazoak eta bioaniztasun galerak gogorarazi zituzten. Hain zuzen, garraioaren sektoreak berak energia zein industriaren sektoreekin batera klima aldaketan eragina izan duela gogorarazi zuten.
250 tona CO2 xurgatuko ditu
Garraio publikoa erabiltzeak berez ekartzen duen kutsadura murrizketaz gain, baso horrekin CO2 isurketak ere murriztu nahi dituzte. Hala, baso naturala, hemendik hogei urtera, atmosferan pilatutako 250 tona CO2 jasotzeko gai izango dela ziurtatu dute. Urteen poderioz, gainera, kopuru hori handitzen joango da.
