EAJren ekimenez, bertako langabeak kontratatu beharko dituzte hotelerako
Asteartean onartu zuten San Juan plazan hotela eraikitzeko pliegoa. Aho batez onartu zuten, baina eztabaida luzearen ondorioz. Izan ere, EAJren udal taldeak emendakin bat aurkeztu zuen, pliegoan izaera sozialeko klausula bat gehitzeko eskatuz, “l...
Asteartean onartu zuten San Juan plazan hotela eraikitzeko pliegoa. Aho batez onartu zuten, baina eztabaida luzearen ondorioz. Izan ere, EAJren udal taldeak emendakin bat aurkeztu zuen, pliegoan izaera sozialeko klausula bat gehitzeko eskatuz, “lan munduan sartzeko zailtasun handienak dituzten gizarte-taldeetako langabeak kontuan hartzeko, edo krisiaren ondorioz, ixtera behartuta ikusi den Irungo enpresaren batean lanean jardun duten pertsonak kontratatzeko”. Goizeko bozeramaileen batzordean idazkariak ohartarazi zuen emendakin horrek ez zuela legea betetzen, baina EAJk plenora eraman nahi izan zuen, gaiaren gaineko eztabaida pizteko.
Eta osoko bilkuran eztabaida piztu zen. PPk, Bilduk eta Ezker Batuak bat egin zuten pliegoan “krisiak gehien kolpatu dituenak” aintzat hartzeko beharrarekin, eta udal gobernuak ere ez zuen gaizki ikusi eta alkateak etenaldia egitea proposatu zuen gaia aztertzeko. Bozeramaileak eta idazkaria elkartu ziren, eta, goizean egin ez bezala, jeltzaleen idatziari legezko itxura eman zioten. Hala, San Juan plazako hotelari legea betetzen duen “baldintza berezi” bat atxikitu zioten pliegoari, “eraikuntzarako kontratatutakoen artean %20 gutxienez langabeak izatea, eta kudeaketarako %60″.

