‘Etorkizunean bakean bizi’ jardunaldiak antolatu dituzte
Etorkizunean bakean bizi lelopean jardunaldiak antolatu ditu BAT Bakearen aldeko Taldeak. “Gure herriaren historiaren ikuspuntutik oso une berezi eta garrantzitsuan aurkitzen gara”, nabarmendu dute antolatzaileek eta jardunaldien helburua, ...
Etorkizunean bakean bizi lelopean jardunaldiak antolatu ditu BAT Bakearen aldeko Taldeak. “Gure herriaren historiaren ikuspuntutik oso une berezi eta garrantzitsuan aurkitzen gara”, nabarmendu dute antolatzaileek eta jardunaldien helburua, “guztion artean bake-bizitza eraikitzen hastea” dela gaineratu dute.
Etzi egingo dute jardunaldien barruko lehenengo saioa. Bizikidetzaren bila izenburupean, erlijio nahiz pentsaera askotariko lagunak bilduko dira, taldeak Madalen kaleko 18. zenbakian duen egoitzan, 19:00etatik aurrera: “Indarkeriaren zein giza eskubideen urraketaren aurrean izan dugun jokaera aztertu ondoren, etorkizunean gauzak aldatzen ahalegintzeko konpromiso zehatzera iristen saiatuko gara. Bertan izango garenon artean, kristauak, bahai erlijioko kideak, musulmanak, eta agnostikoak izango dira”.
Hilaren 23an, bigarren saioa
Sufrimenduaren gaia ere jorratuko dute Bakearen Aldeko Taldekoek antolatu dituzten jardunaldietan. Azken hori izango da bigarren saioko protagonista hain zuzen ere. Sufrimendua gogoan izenburupean, hilaren 23an bilduko dira berriro, ordutegi eta leku berean. “Herri honetan era askotako sufrimendua” izan dela esanda, pairatu dutenak jardunaldian biltzea ezinezkoa izango dela adierazi dute antolatzaileek: “Hala ere, haienganako hurbiltze giroan egingo dugu jardunaldia”.
Horren harira, “Oarsoaldean erasopean hildakoen izen abizenak irakurriko ditugu eta gainontzeko sufrimenduak ere gogoraraziko ditugu”, esan dute jardunaldien antolatzaileek. Halaber, memoria lantzeko ahaleginekin bat egingo dutela aurreratu dute.
