Aireportua ez luzatzeko erabakiarekin bat egin du Eguzkik
Eguzki talde ekologistak Gipuzkoako Foru Aldundiaren erabakiarekin bat egin du, Txingudiko hezegunean eragin zuzena izango lukeen Hondarribiko aireportua luzatzearen aurka. Talde ekologistak azaldu duenez, «babes berezia eskatzen duten guneei eragiten...
Eguzki talde ekologistak Gipuzkoako Foru Aldundiaren erabakiarekin bat egin du, Txingudiko hezegunean eragin zuzena izango lukeen Hondarribiko aireportua luzatzearen aurka. Talde ekologistak azaldu duenez, «babes berezia eskatzen duten guneei eragiten dieten proiektuak ez laguntzeko erabakia hartu du Gipuzkoako Foru Aldundiak, kasu honetan, Hondarribiko aireportuaren handitzeak ekarriko lukeena. Txingudiko padurak babesteko erabaki garrantzitsua izan da».
Hala, aldundiak biodibertsitatearen alde hartutako jarrera babestu dute ekologistek: «Soinuaren eta atmosferaren kutsaduraren areagotzeak, Hondarribia, Hendaia eta Irungo biztanleen osasunean eta bizitza kalitatean eragin zuzena izango luke, baita Txingudiko badian eta Plaiaundiko parke ekologikoan bizi diren hegaztien ugalketan ere». Bertako ekosistema babesteko, LIFE-Naturaleza erakundeak laguntza eman zuen.
Babestutako gunea
212 espezie baino gehiago bizi dira Plaiaundin, eta horietako asko, desagertzeko arriskuan daude, edo espezie bitxi edo lehentasunezko espezie bezala sailkatuta daude. Babestutako itsas estuarioa osatzen du Txingudik, eta Natura 2000 sarearen eta Ramsar hezeguneen gaineko hitzaremenen bitartez babestuta dago.
«Aireportua handitzeak, gizakiaren osasuna arriskuan jarri, eta ingurumena, baliabide naturalak eta babestutako ekosistemak honda ditzake».
