Garaipen erraza lortu du Irun RTk, eta igoera faserako ia sailkatuta dago
Liderrari irabazi eta gero, emaitza berberaren bila abiatu zen Irun Rugby Taldea larunbatean Fadurara; hots, Euskal Herriko Ligako bigarren faseko sailkapena ixten duen Getxo Bren kontrako garaipenaren bila. Erraz nagusitu ziren irundarrak (15-44). Sai...
Liderrari irabazi eta gero, emaitza berberaren bila abiatu zen Irun Rugby Taldea larunbatean Fadurara; hots, Euskal Herriko Ligako bigarren faseko sailkapena ixten duen Getxo Bren kontrako garaipenaren bila. Erraz nagusitu ziren irundarrak (15-44).
Sailkapenean Bilboko Unibertsitatearen atzetik daude beltzak, eta play off postuetatik kanpo dagoen lehen taldeari, Riojari, zortzi puntu ateratzen dizkiote. Gainera, bi talde horiek partida bat gehiago jokatu behar dute, lehen itzuliko euren arteko norgehiagoka atzeratu behar izan zutelako. Partida horrez gain, beste bi geratzen dira bigarren fasea bukatzeko, horietako bat, heldu den asteburukoa, errioxarren aurka. Irabaziz gero, Irun RT igoerako kanporaketetan izango da. Galduta ere, beste bi aukera izango ditu sailkatzea lortzeko.
Kadete Mailako taldeak ere garaipena lortu zuen Durangon (7-24). Hurrengo partida datorren larunbatean jokatuko dute, Plaiaundin, Bilboko Unibertsitatearen kontra. Bigarren fasean jokatutako sei partidak irabazita, lidergoan dira Irungo kadeteak, 29 punturekin.
EHko Liga. 2. fasea.
SAILKAPENA
- Bilboko Unibertsitatea. 31 puntu.
- Zaisa Irun RT. 24 puntu.
- Elorrio Parra taberna. 20 puntu.
- Rioja Sport Tavern. 16 puntu.
- Arratiko Zekorrak 10 puntu.
- Getxo Artea B. 8 puntu.
