Pontikako lurzoruko kutsadura maila aztertuko du udalak
Pontikako ibarreko lurzoruko kutsadura maila aztertzeko lanak hasiko ditu Errenteriako Udalak, Jose Manuel Ferradas Ingurumen eta Mendi zinegotziak jakinarazi duenez. Horren harira, egun degradatu eta lurperatutako Mastiko Ubidearen leheneratzea aurreikusi dutela gaineratu du. Ikerketa gauzatzeko, Ondoan S. Coop. enpresarekin 34.000 euroko kontratua sinatu du udalak hilabete hasieran. Eusko Jaurlaritzaren diru laguntza jasoko du udalak eta enpresak berriz, lau hilabeteko epean bukatuko du lana. Pontikako ibarraren azterketa historikoa, ingurune fisikoaren ikerketa, plangintza analitikoa duen laginketa estrategia, jasotako emaitzen balorazioa eta arriskuen analisia egingo ditu enpresak. Halaber, bost metroko sakonerako zundaketa mekanikoak, piezometroak, eta lurzoruaren, hondakinen eta uraren laginketak egingo dituzte Pontikan, industriak eragindako kutsadura zehazte aldera. ” Baliteke konposatu kutsatzaileak azaltzea: metal astunak, kloratutako disolbatzaileak, olio mineralak, zianuroak edota PCBak” zehaztu du Ferradasek. Izan ere, ingurune horretan 1858. urteaz geroztik eta 1975 urtera arte ehun-gaien akabera eta larrua lantzen zuten enpresak aritu ziren lanean. Antzinako paduran aritu zen lanean ere metalaren sektoreko GECOTOR enpresa. Kutsadura kendu Azterketa lanak amaituta, legezko mugak gainditzen dituzten kontzentrazioak atzemanez gero, udalak “ikerketa zehatza” egingo duela azaldu du Ferradasek “Pontikako ibarrean kutsadura guztia kentzeko, azkenik”. Udalak, Pontikako Auzo Elkarteri, Ingurumen Aholku Batzordeari zein talde ekologistei hartutako erabaki eta eman beharreko urrats guztien gaineko informazioa emango diela [...]
Pontikako ibarreko lurzoruko kutsadura maila aztertzeko lanak hasiko ditu Errenteriako Udalak, Jose Manuel Ferradas Ingurumen eta Mendi zinegotziak jakinarazi duenez. Horren harira, egun degradatu eta lurperatutako Mastiko Ubidearen leheneratzea aurreikusi dutela gaineratu du.
Ikerketa gauzatzeko, Ondoan S. Coop. enpresarekin 34.000 euroko kontratua sinatu du udalak hilabete hasieran. Eusko Jaurlaritzaren diru laguntza jasoko du udalak eta enpresak berriz, lau hilabeteko epean bukatuko du lana. Pontikako ibarraren azterketa historikoa, ingurune fisikoaren ikerketa, plangintza analitikoa duen laginketa estrategia, jasotako emaitzen balorazioa eta arriskuen analisia egingo ditu enpresak.
Halaber, bost metroko sakonerako zundaketa mekanikoak, piezometroak, eta lurzoruaren, hondakinen eta uraren laginketak egingo dituzte Pontikan, industriak eragindako kutsadura zehazte aldera. ” Baliteke konposatu kutsatzaileak azaltzea: metal astunak, kloratutako disolbatzaileak, olio mineralak, zianuroak edota PCBak” zehaztu du Ferradasek.
Izan ere, ingurune horretan 1858. urteaz geroztik eta 1975 urtera arte ehun-gaien akabera eta larrua lantzen zuten enpresak aritu ziren lanean. Antzinako paduran aritu zen lanean ere metalaren sektoreko GECOTOR enpresa.
Kutsadura kendu
Azterketa lanak amaituta, legezko mugak gainditzen dituzten kontzentrazioak atzemanez gero, udalak “ikerketa zehatza” egingo duela azaldu du Ferradasek “Pontikako ibarrean kutsadura guztia kentzeko, azkenik”.
Udalak, Pontikako Auzo Elkarteri, Ingurumen Aholku Batzordeari zein talde ekologistei hartutako erabaki eta eman beharreko urrats guztien gaineko informazioa emango diela azaldu du Ferradasek.
