Mozioa aurkeztuko dute amiantoaren biktimak babesteko
Pasa den abenduaren 4an Angel Robles errenteriarra hil zen, amiantoak eragindako gaitzak jota. Egoera horren aurrean, Errenteriako Udalak “urrats bat egitea” beharrezko ikusi du, eta udal talde guztiek gai horren gaineko mozio bat sinatu du...
Pasa den abenduaren 4an Angel Robles errenteriarra hil zen, amiantoak eragindako gaitzak jota. Egoera horren aurrean, Errenteriako Udalak “urrats bat egitea” beharrezko ikusi du, eta udal talde guztiek gai horren gaineko mozio bat sinatu dute. Astearteko udalbatzarrean eztabaidatuko dute.
Batetik, mozioak aurreko udal gobernuak onartutako neurriak berretsiko ditu Errenteria-Oreretan amiantoaren inbentarioa egitearen harira, hain zuzen. Udalak jakinarazi duenez, dagoeneko inbentarioa martxan jarri dute, “baina bultzada eta garapen berri bat” eman nahi diote.
Hurrengo neurria Roblesen heriotzaren testuinguruarekin lotuta dago: “Fagor-Luzuriagako langilea izan zen, eta hainbat komunikabidetan gaixotasunaren jatorri profesionala ukatu ziotela salatu ondoren hil zen. Hil honen hasieran, Gipuzkoako Gizarte Segurantzak gaixotasun profesional bezala onartu du amiantoa erabiltzeagatik eduki zuen biriketako minbizia”.
Horrenbestez, Eusko Jaurlaritzari eskatu dio zenbait neurri har ditzan: Osalanek amiantoa erabili duten erretiratuak zaintzeko protokolo espezifiko bat martxan jartzea; gaixotasun berriak detektatzeko protokolo bat aurrera eramatea; mutuekin elkarlan mekanismoak ezartzea eta amiantoaren biktimentzako konpentsazio funts bat sortzea, kaltetuei kalte ordainak bermatzeko.
