Eskola publikoaren eskaintzaren berri eman dute
Etzidamu zabalduko dute 2012-2013 ikasturterako aurrematrikulazio epea, eta otsailaren 10ean amaitu. Horren berri eman eta udalerriko eskola publikoaren eskaintza azaldu zuten atzo Koldo Mitxelena, Cristobal Gamon, Beraun Berri herri eskoletako eta Lan...
Etzidamu zabalduko dute 2012-2013 ikasturterako aurrematrikulazio epea, eta otsailaren 10ean amaitu. Horren berri eman eta udalerriko eskola publikoaren eskaintza azaldu zuten atzo Koldo Mitxelena, Cristobal Gamon, Beraun Berri herri eskoletako eta Langaitz Ikastolako zuzendariek, Hezkuntza arduradun Irune Balentziagarekin batera.
Balentziagak, lau ikastetxeek D ereduaren aldeko apustua egiten dutela eta goiz txokoa, jangela eta garraio zerbitzua bermatzen dituztela zehaztu zuen.
Kalitatezko hezkuntza
Langaitzeko Ritxar Maritxalarrek, eskola publikoarena “kalitatezko” eskaintza dela eta udalerrian dauden lau ikastetxe publikoetan euskararen aldeko “apustu garbia” egiten dutela nabarmendu zuen. Laurek, 2 eta 16 urte arteko eskaintza bermatzen dutela gaineratu zuen.
Halaber, aurrematrikulazio prozesua “oso garrantzitsua” dela esan zuen, eta gurasoei “arduraz” erabakitzeko eskatu zien. Bestalde, aurrematrikula, ikastetxe bat baino gehiago hautatuta ere, zentro bakarrean egin behar dutela gurasoek nabarmendu zuen Koldo Mitxelenako Marian Hernandezek. Markatutako aurrematrikularako epeak errespetatzearen garrantzia ere aipatu zuten Merkatuzarren egindako agerraldian.
Gurasoek, bestalde, ikastetxeak ezagutzeko aukera izango dute. Horretarako, aurten ere, ate irekien jardunaldiak antolatu dituzte: Langaitzen, otsailaren 3an egingo dute, 17:00etatik 18:30era; Gamonen etzidamu, asteazken eta ostiralean, 16:30etik aurrera; eta Koldo Mitxelenan etzidamutik otsailaren 2ra arte, arratsaldez. Beraun Berrin ez dituzte egingo.
Balentziagak emandako datuen arabera, 800 etxetara bidali ditu gutunak Hezkuntza Sailak, udalerriko hezkuntza publikoaren eskaintzaren berri emateko.
