Aurrekontuen aurkezpen publikoa eta osoko bilkura atzeratu dituzte
Irungo udalak aldundiari foru funtsatik itzuli behar dion diru kopuruaren berriskupenak joan den astean udal gobernuak aurkeztutako aurrekontuen aurrerapena berraztertzera behartuko du eta, ondorioz, udal kontuen osoko bilkura atzeratu behar izan dute. Irailean udaleko eta aldundiako arduradunek eginiko bileran itzuli beharreko kopurua 3 milioi izango zela aurreikusi zuten, baina likidazioaren ondoren aldundiak jaso duena uste baino gutxiago izan zenez, udalek foru funtsatik jasotako kopurutik espero baino gehiago itzuli beharko dute, 4.300.000 euro Irungoak: “Irailean egin genuen lehen bilera batean esan ziguten aurreikuspenen arabera 3 bat milioi izango zirela itzuli beharko genituenak. Eta orain itzuli beharreko diru-kopurua igo egin da, ia %50″ azaldu du Miguel Angel Paez udal kontuen arduradunak. Hori horrela, udal gobernuak uste du 2012rako aurrekontu aurrerapenean iragarritako diru sarrerak ez direla beteko; Jose Antonio Santano alkateak dokumentua berraztertzea ezinbestekoa izango dela uste du: “2011ko likidazioaren ondoren Foru Aldundiak Iruni ematen diona 30 milioi badira, esan liteke guztiz ezinezkoa izango dela urte honetarako egina ziguten aurreikuspena lortzea, aurreikuspenaren arabera iragartzen bait ziguten 33 milioi eta erdi esleituko zigutela; horregatik uste dugu zentzuzkoa dela aurrekontuen zirriborroa berriz aztertzea eta zuhurrago jokatzea”. Egoera kezkagarria Udalean ordezkaritza duten alderdietako bozeramaileekin bildu zen herenegun alkatea, sortu den egoerarengatik kezka agertu, eta kontuen osoko [...]
Irungo udalak aldundiari foru funtsatik itzuli behar dion diru kopuruaren berriskupenak joan den astean udal gobernuak aurkeztutako aurrekontuen aurrerapena berraztertzera behartuko du eta, ondorioz, udal kontuen osoko bilkura atzeratu behar izan dute. Irailean udaleko eta aldundiako arduradunek eginiko bileran itzuli beharreko kopurua 3 milioi izango zela aurreikusi zuten, baina likidazioaren ondoren aldundiak jaso duena uste baino gutxiago izan zenez, udalek foru funtsatik jasotako kopurutik espero baino gehiago itzuli beharko dute, 4.300.000 euro Irungoak: “Irailean egin genuen lehen bilera batean esan ziguten aurreikuspenen arabera 3 bat milioi izango zirela itzuli beharko genituenak. Eta orain itzuli beharreko diru-kopurua igo egin da, ia %50″ azaldu du Miguel Angel Paez udal kontuen arduradunak.
Hori horrela, udal gobernuak uste du 2012rako aurrekontu aurrerapenean iragarritako diru sarrerak ez direla beteko; Jose Antonio Santano alkateak dokumentua berraztertzea ezinbestekoa izango dela uste du: “2011ko likidazioaren ondoren Foru Aldundiak Iruni ematen diona 30 milioi badira, esan liteke guztiz ezinezkoa izango dela urte honetarako egina ziguten aurreikuspena lortzea, aurreikuspenaren arabera iragartzen bait ziguten 33 milioi eta erdi esleituko zigutela; horregatik uste dugu zentzuzkoa dela aurrekontuen zirriborroa berriz aztertzea eta zuhurrago jokatzea”.
Egoera kezkagarria
Udalean ordezkaritza duten alderdietako bozeramaileekin bildu zen herenegun alkatea, sortu den egoerarengatik kezka agertu, eta kontuen osoko bilkura “gutxienez otsailaren 15a arte” atzeratzeko erabakia aurreratu zien. “Zuhurtziaz eta arduraz jokatu behar da hiriko aktibitatea eta proiektuak errealismoz bermatuko dituen aurrekontu bat erabiltzeko garaian. Paperean edozein gauza jar daiteke, baina ziurtasuna izan behar da eskura izango ditugun diru-baliabideei dagokienez eta beldur naiz horrek ez ote gaituen 2006ko foru ekarpenen zifretara eramango”, gaineratu du Santanok.
Horrenbestez, 2012ko aurrekontuen zirriborroa berriz aztertuko dute, diru sarreren kopurua gutxienez aurtengo likidaziora mugatuta, foru funtsaren finantzaketa aurreikuspen errealistagoago batean oinarrituta. “Kontuan izan behar dugu Irungo Udalaren diru-sarreren %53 foru ekarpen horretatik etortzen dela eta, horregatik, ezinbestekoa zaigu jakitea ziurtasun handienarekin zenbat diruz ari garen hizketan. Ez da itxurazkoa lehenik diru bat esleitzea, eta gastatu dugunean, itzuli beharra daukagula esatea” argitu du Paezek.
Aurkezpena ere atzeratu dute
Kontuen zirriborroa berraztertu beharko dutenez, bertan behera geratu da hilaren 23rako egin behar zuten aurkezpen publikoa. Kontu zirriborro berria izandakoan data berria emango dutela iragarri dute udaletik.
