Kaleratze bat salatzeko protesta egingo dute etzi Kutxako bulegoaren aurrean
Mari Carmen Marquez errenteriarrak eta bere gurasoek ez dituzte momentu onak bizi. Kutxa Marquezen gurasoek Beraunen duten etxearen jabe egin da enkante batean, eta gurasoak kalean geratzekoak dira. Egoera hori salatzeko Gipuzkoako Stop Desahuciosek, Beraungo Erlontzi emakume elkarteak, Oarso laguntzarako taldeak eta Beraungo bizilagunen elkarteak protestara deitu dituzte etzi herritarrak. Duela hilabete joan ziren Kutxak Donostian duen egoitza nagusira Marquezen familiari irtenbide bat emateko proposamen bat aurkeztera. Gaur-gaurkoz, ordea, ez dute erantzunik jaso. Xabier Garcia Stop Desahucioseko kideak gogorarazi duenez, Kutxa gurasoen etxearen jabe egin da tasazioaren %60aren truke. Kutxaren erantzunarekin, ordea, harrituta geratu ziren, Marquezek aurkitu zuelako etxebizitza erosteko interesatu bat: «Gainera, pertsona horrek Kutxak baino diru kopuru handiagoa ematen zion, eta bermatzen zion gurasoak etxean egotea alokairu baten truke. Kutxak ez du hori nahi izan». Orain, noiz kaleratuko zain daude. Oraindik ez daukate datarik. Garciaren esanetan, behin etxebizitzaren jabe egitetik kaleratzeko agindua eman arte, hilabete pasatu daiteke edo gehiago, «bankuaren asmoaren arabera». Bitartean, Marquez eta bere familia «geroz eta okerrago» daude. «Gauza asko agintzen dizkizute, baina gero ezerezean geratzen dira», adierazi du kaltetuak. Testuinguru horretan, «pauso bat gehiago» ematea erabaki dute, eta «herritarrek kaleratzeen kontra egingo duten lehen mobilizazioa» deitzea erabaki dute. Etzi, 12:00etan bilduko dira Beraungo Pablo [...]
Mari Carmen Marquez errenteriarrak eta bere gurasoek ez dituzte momentu onak bizi. Kutxa Marquezen gurasoek Beraunen duten etxearen jabe egin da enkante batean, eta gurasoak kalean geratzekoak dira. Egoera hori salatzeko Gipuzkoako Stop Desahuciosek, Beraungo Erlontzi emakume elkarteak, Oarso laguntzarako taldeak eta Beraungo bizilagunen elkarteak protestara deitu dituzte etzi herritarrak.
Duela hilabete joan ziren Kutxak Donostian duen egoitza nagusira Marquezen familiari irtenbide bat emateko proposamen bat aurkeztera. Gaur-gaurkoz, ordea, ez dute erantzunik jaso. Xabier Garcia Stop Desahucioseko kideak gogorarazi duenez, Kutxa gurasoen etxearen jabe egin da tasazioaren %60aren truke. Kutxaren erantzunarekin, ordea, harrituta geratu ziren, Marquezek aurkitu zuelako etxebizitza erosteko interesatu bat: «Gainera, pertsona horrek Kutxak baino diru kopuru handiagoa ematen zion, eta bermatzen zion gurasoak etxean egotea alokairu baten truke. Kutxak ez du hori nahi izan».
Orain, noiz kaleratuko zain daude. Oraindik ez daukate datarik. Garciaren esanetan, behin etxebizitzaren jabe egitetik kaleratzeko agindua eman arte, hilabete pasatu daiteke edo gehiago, «bankuaren asmoaren arabera». Bitartean, Marquez eta bere familia «geroz eta okerrago» daude. «Gauza asko agintzen dizkizute, baina gero ezerezean geratzen dira», adierazi du kaltetuak.
Testuinguru horretan, «pauso bat gehiago» ematea erabaki dute, eta «herritarrek kaleratzeen kontra egingo duten lehen mobilizazioa» deitzea erabaki dute.
Etzi, 12:00etan bilduko dira Beraungo Pablo Sorozabal plazan azoka eguna baliatuta. Egoerari buruzko informazioa eman ostean, auzoko kaleetan ibiliko dira Maurice Ravel kaleko Kutxaren bulegora iritsi arte. 12:45erako han egotea espero dute, eta ordu laurdeneko elkarretaratzea egingo dute.
Protesta horretan etxebizitza duina aldarrikatu eta Kutxak izan duen jarrera «zorrotza, lukurra eta batzuetan iraingarria» salatuko dute. Beharrezkoa ikusten dute herritarrak egoera horretaz jabetzea, «bihar edozeini gerta dakiokeen egoera delako».
