Gutuna: Gero arte Gaintza
Juanito Gaintza fisikoki gure artetik joan zaigu, baina betiko iltzatuta geratuko da gure oroimen eta bihotzetan, bere izaera eskuzabal, langile eta jatorragatik. Baratza-koperatiba proiektu txikia daukagu eskuartean, txikia bezain ederra gure pentsame...
Juanito Gaintza fisikoki gure artetik joan zaigu, baina betiko iltzatuta geratuko da gure oroimen eta bihotzetan, bere izaera eskuzabal, langile eta jatorragatik.
Baratza-koperatiba proiektu txikia daukagu eskuartean, txikia bezain ederra gure pentsamenduetan egitasmo xume honi forma eman nahian prestakizunean gabiltza ilusioz beterik, eta Gaintza alor honetan nabartzen zen bereziki. Joan zaigun une mingots honetan topiko bat dirudien arren, bera zen ilusio, gogo eta kemen gehien jartzen zuena. Taldea osatu genuenean hurbiltzen azkena izan arren, berehala hasi zen besteoi tiraka, zalantzak txiki uzten eta ilusioa nabarmentzen.
Joan den aste osoan baso zati bat garbitzen aritu ginen, eroritako arkazietatik, itxitura egiteko beharrezko diren esolak ateratzen. Goizero elkartzen ginenean, hor azaltzen zitzaigun gosari eder batekin ardo botila eta guzti, baina ez edozein ardoarekin ez, kriantza izan behar zuen, une horri behar duen xarma emateko.
Holakoxea zen gure Gaintza, taldea sendotzeko eta ilusioa indartzeko gauza txikiak kontutan hartzen zituena.
Astelehenean birrinduta gelditzerainoko kolpea jaso genuen, baina berak erakutsitako eskuzabaltasun, ilusio eta kemena altxor bat bezala gordeko dugu gure bihotzetan Gaintza, guretzat ohore bat izan da zurekin partekatutako denbora labur bezain emankorra. Guzti horrengatik, eskerrik asko maitia.
Josetxo, Josu, Ibon, Zvonko eta Peliar.
