Nor da musean trebeena?
Herriz herri Euskal Herriko Mus Txapelketaren barruko kanporaketak egingo dituzte, eta final nagusia martxoaren 17an izango da
«Euskal Herriak bizi duen zatiketa gainditu eta horretarako oinarri bezala zazpi herrialdeetako muslariak elkar topatzeko», Euskal Herriko Mus Txapelketa antolatu dute laugarrenez Orreaga, Iparra-Hegoa eta Bai Euskal Herriari herri ekimenek. Oarso Bidasoan txapelketa horren barruko kanporaketak egingo dituzte.
Hala, bide horretan, lehen kanporaketa hilaren 6an egin zuten Errenteria-Oreretako Landaren. Hurrengoak honakoak dira: hilaren 28an Irungo Hazia elkartean (17:00etatik aurrera) egingo dute udalerri horretako kanporaketa, eta otsailaren 4an Urruña-Pausukoa egingo dute, azken herri horretako Xaia ostatuan. 15:00etan hasiko da lehia hori. Gainontzeko herrietan ere egingo dituzte kanporaketak, baina oraindik ez dituzte zehaztu.
Herri bakoitzeko kanporaketetan onenak herrialdeetako finaletara joango dira. Otsailean egingo dituzte final horiek. Eta zazpi herrialdeetako 16 bikote onenek Euskal Herriko finala jokatuko dute, martxoaren 17an.
Iaz, 2.400 bikote
2009an egin zuten lehenengoz Euskal Herriko Mus Txapelketa. Orduan, 1.200 bikotek parte hartu zuten lehian. 2010ean 1.800 bikoteraino hazi zen parte hartzaileen kopurua, eta iaz, 2.400 izan ziren txapelaren bila joan zirenak. Aurten kopuru hori gaindituko dutela ziur daude antolatzaileak.
Lehian izena herri bakoitzean eman behar da. Hau da, norberari dagokion herriko kanporaketara agertu behar da, 20 euro ordaindu, eta jokatzen hasi. Hala, herriz herri sariak emango dituzte tokian tokiko antolatzaileek, baina finalean sari potoloagoak izango dira.
Hala, Euskal Herriko muslari trebeenek, txapela eta garaikurraz gain, 3.000 euro eta lau lagunentzako bidaia irabaziko dute. Txapeldunordeek, berriz, garaikurra, 1.500 euro eta lau lagunentzako bidaia irabaziko dute; hirugarrenek, 750 euro eta lau lagunentzako asteburuko egonaldia; eta laugarrenek, 500 euro eta euskaraz ikasteko urte osoko bi matrikula. 16. bikotera arte emango dituzte sariak martxoaren 17ko final handian.
2011ko irabazleak
