Hondarribiko Matxin Artzu kaleko bigarren faseko obrak hasi dituzte
Atzo hasi zituzten Matxin Artzu eta Bernat Etxepare kaleak berritzeko bigarren faseko lanak. Lehen fasea 2011ko irailean hasi zuten eta hirugarrena, eta azkena, ekainean bukatzea espero dute. «Orain hasi eta Aste Santua bitarte, Portuko elizaren aurr...
Atzo hasi zituzten Matxin Artzu eta Bernat Etxepare kaleak berritzeko bigarren faseko lanak. Lehen fasea 2011ko irailean hasi zuten eta hirugarrena, eta azkena, ekainean bukatzea espero dute.
«Orain hasi eta Aste Santua bitarte, Portuko elizaren aurrean hasi, eta Matxin Artzu kalearen amaierara arte egingo dira lanak, Zuloaga kalearekin bat egiten duen gunera arte. Gero azken urratsa iritsiko da, Bernat Etxepare kalekoa hain zuzen. Lanen azken errepasoa 2012ko ekainean egingo dute langileek», azaldu zuen atzo goizean Aitor Kerejeta alkateak.
Obren gaineko balorazio positiboa egin du udalak. «Epeak betetzen ari gara, eta ikusi besterik ez dago nola geratu den orain arte egindakoa, hurrengo fasea nolakoa izango den ikusteko», nabarmendu zuen Kerejetak.
Oinezkoentzat
Oinezkoei lehentasuna eman nahi diete lanekin, eta espaloi zabalak, eserlekuak eta argiztapen eta zuhaitz berriak jarri dituzte. Gainera, lur azpitik doazen ur garbi eta zikinak banatu dituzte, hodi berriekin.
Hala, www.hondarribia.org webgunean lan horien gaineko banner bat jarri dute, eta bertan informazioa lortzeaz gain, helbide elektroniko bat dago obrari buruzko iritzi eta iradokizunak bidaltzeko.
