Fausto Anza: Agur harakin konprometituari
Atzo eman zioten azken agurra Fausto Anzari. Larunbatean zendu zen oreretarra 60 urterekin. Bilbon euskal presoen alde egindako manifestazioaren ondoren, etxera itzultzeko autobusa hartzera zihoanean bihotzekoak emanda hil zen. Fausto Anza aski ezaguna...
Atzo eman zioten azken agurra Fausto Anzari. Larunbatean zendu zen oreretarra 60 urterekin. Bilbon euskal presoen alde egindako manifestazioaren ondoren, etxera itzultzeko autobusa hartzera zihoanean bihotzekoak emanda hil zen.
Fausto Anza aski ezaguna zen herritarren artean. Amulleta elkarteko bazkide, ordu ugari eman zituen Niessen elkartearen bueltan. Joan den urtean erretiroa hartu arte, herriko supermerkatu bateko harakina izan zen, eta herritar ugarirentzako horregatik zen ezaguna. Horrekin batera, Errenteria-Oreretako euskal presoen senideen artean ere ezaguna zen Anza. Beraiekin bat egitea egokitu zitzaion semea 2008. urtean Oarsoaldeko gazteen aurkako sarekadan atxilotu eta espetxeratu zutenean. Sagardo Egunaren antolaketan erabat inplikatuta, udalerrian antolatutako herri bazkari eta afari guztietan ere aritu da sukaldari.
Izaerari dagokionez, lagunartekoa, alaia. Hurbilekoek nabarmendu dutenez, “dena emateko prest zegoen beti. Emozioz betetako besarkadak ematen zituen”. Indar handiko gizona zen, baina aldi berean erraz, maiz, hunkitzen zena. Indarrak eta emozioek ez dutelako zertan kontrajarriak izan. Zalantzarik gabe, itzala uzten duten horietakoa izan da Anza.
