Mikelazulon kultura librearen gainean eztabaidatuko dute
Kultura librea izango da Mikelazulo kultur elkartean mahai gainean jarriko duten gaia. Igandean, 10:30etik aurrera, gosari-solasaldia egingo dute gaiaren gainean hitz egiteko. Gaiaren testuingurua “kultura gizartearen behar bat” dela izango...
Kultura librea izango da Mikelazulo kultur elkartean mahai gainean jarriko duten gaia. Igandean, 10:30etik aurrera, gosari-solasaldia egingo dute gaiaren gainean hitz egiteko. Gaiaren testuingurua “kultura gizartearen behar bat” dela izango da, eta kulturak “berez libre” izan beharko lukeela planteatuko dute Mikelazuloko kideek.
Mikelazuloko kideez gain, Bakalhau taldekoek ere parte hartuko dute. Interneten duten webgunearen bidez errealitatea aldatzera bideratutako hausnarketa sustatzen ari dira lanean. Bi taldeek hainbat ikuspegi eta definizio emango dituzte. Eztabaida sortzeaz gain, kultura librea landu eta defendatzeko klabe politikoak zehazten saiatuko dira.
Horretarako, egungo sistema kulturala zerk sostengatzen duen azalduko dute, eta hiru galdera botako dituzte: Noiz sortu zen gaur egun ezagutzen dugun jabetza intelektuala?; Zein bidetatik iritsi gara sormenaren apropiazio indibidualistara? eta Zein balore eta ideietan sostenga dezakegu kultura librea?
Hiru ikuspuntutatik aztertuko dute gaia: herrigintza eta sormena, Imanol Epelderekin; estetika eta politika, Hedoi Etxarterekin; eta teknologiaren bide eraldatzaiak, Marko Txopitenarekin.
Gai horiek planteatu ostean hasiko dira solasaldi irekiarekin.
