Sinesteko garaia iritsi da
Hiri Debekatuaren Mapa programaren ondorio eta proposamenen txostena aurkeztu zuten larunbat eguerdian Oiasso Erromatar Museoaren hitzaldi aretoan. 2009an eta iaz Bilgune Feministak Katea eta Arbes auzoetan egindakoa oinarritzat hartuz, urrian hainbat tailer egin zituzten auzoz auzo, emakumeentzako seguruak ez diren lekuak zehazteko. Ikastaroetan landutakoarekin Murgibe aholkularitza enpresak txosten bat prestatu du, udaleko zenbait sailetan banatuko dutena. Puntu ilunetako batzuk zuzentzeko proposamenak ditu txostenak, eta beste batzuk Berdintasun eta Hiri Antolamendu Orokorreko planetan, besteak beste, kontuan hartuko dituzte. Urriko ikastaroetan parte hartu zuten zenbait emakume hurbildu ziren larunbatean Oiassora, haiek egindako ekarpenak jasotzen dituen txostenaren aurkezpenera. Sinesteko ekitaldi bat izan zen, emakumeek Irungo hirigintzan eragin dezaketela sinesteko. Bilgune Feministako kide Oihana Etxebarrietak sinestearen garrantzia nabarmendu zuen. «Gure iritziak aintzat hartuko ez dituztela pentsatzera ohituta gaude», esan zuen. Bere ustez, Hiri Debekatuaren Mapa osatzen lagundu duten emakumeen ekarpena garrantzitsua izan da, «nahiz eta zenbakiz txikia izan den». Maite Cruzado Gizarte Ongizateko ordezkariak Bilguneak hasitako lana txalotu zuen: «Katean eta Arbesen egindako lana aurkeztera udalera etorri zirenean, ideia zoragarria iruditu zitzaigun, hiriko beste auzoetara nahitaez hedatu beharrekoa». Hala egin zuten, Emakundek propio emandako diru laguntza baliatuz. Emakunderen zigilua Alicia Mitxelena Ongizate Saileko teknikariak Emakunderen laguntza eskertu zuen: «Batetik, komunikazio kanpaina egiten lagundu digu; [...]
Hiri Debekatuaren Mapa programaren ondorio eta proposamenen txostena aurkeztu zuten larunbat eguerdian Oiasso Erromatar Museoaren hitzaldi aretoan. 2009an eta iaz Bilgune Feministak Katea eta Arbes auzoetan egindakoa oinarritzat hartuz, urrian hainbat tailer egin zituzten auzoz auzo, emakumeentzako seguruak ez diren lekuak zehazteko. Ikastaroetan landutakoarekin Murgibe aholkularitza enpresak txosten bat prestatu du, udaleko zenbait sailetan banatuko dutena. Puntu ilunetako batzuk zuzentzeko proposamenak ditu txostenak, eta beste batzuk Berdintasun eta Hiri Antolamendu Orokorreko planetan, besteak beste, kontuan hartuko dituzte.
Urriko ikastaroetan parte hartu zuten zenbait emakume hurbildu ziren larunbatean Oiassora, haiek egindako ekarpenak jasotzen dituen txostenaren aurkezpenera. Sinesteko ekitaldi bat izan zen, emakumeek Irungo hirigintzan eragin dezaketela sinesteko.
Bilgune Feministako kide Oihana Etxebarrietak sinestearen garrantzia nabarmendu zuen. «Gure iritziak aintzat hartuko ez dituztela pentsatzera ohituta gaude», esan zuen. Bere ustez, Hiri Debekatuaren Mapa osatzen lagundu duten emakumeen ekarpena garrantzitsua izan da, «nahiz eta zenbakiz txikia izan den».
Maite Cruzado Gizarte Ongizateko ordezkariak Bilguneak hasitako lana txalotu zuen: «Katean eta Arbesen egindako lana aurkeztera udalera etorri zirenean, ideia zoragarria iruditu zitzaigun, hiriko beste auzoetara nahitaez hedatu beharrekoa». Hala egin zuten, Emakundek propio emandako diru laguntza baliatuz.
Emakunderen zigilua
Alicia Mitxelena Ongizate Saileko teknikariak Emakunderen laguntza eskertu zuen: «Batetik, komunikazio kanpaina egiten lagundu digu; eta bestetik, nolabaiteko labela suposatu du; Emakundek egitasmoa onartu izana, ona izan dela esan nahi du». Egindako lan on hori «ezerezean ez geratzeko» konpromisoa hartu zuen Cruzadok larunbatean.
Murgibeko Irati Burgesek eta Itsasne Martinezek puntu ilunen zerrenda osatzeko tailerretan parte hartu zuten, eta beraiek prestatutako txostenean 47 puntu ilun jaso dituzte, tailerretan jasotakoak eta Internet bidez jasotakoak irun.org webgunearen bitartez. Puntu ilun horiek argitzeko eskatuko diete udaleko hainbat sailetako arduradunei.
Hirigintza arloan dagoeneko kontuan hartzen ari dira horiek guztiak. Hala argitu zuen larunbateko ekitaldian hitza hartu zuen udal arkitekto batek: «Bilguneak hasitako lanaren ondoren genero hirigintza kontuan hartzen dugu». Hori zen hasierako helburua, hiria emakumeen ikuspuntutik eraiki daitekeela sinestea.
