‘Jainko arpilatzaileak’ filmarentzat FICABeko Sari Nagusia
Adolfo Contik zuzendutako Jainko arpilatzaileak (Ladri di dei) filmak irabazi zuen Bidasoko XI. Nazioarteko Zinemaldi Arkeologikoko Sari Nagusia. 51 minutuko lana da, eta zaharkien trafikoaren merkatuaren atzean izkutatzen dena lantzen du; batetik, mus...
Adolfo Contik zuzendutako Jainko arpilatzaileak (Ladri di dei) filmak irabazi zuen Bidasoko XI. Nazioarteko Zinemaldi Arkeologikoko Sari Nagusia. 51 minutuko lana da, eta zaharkien trafikoaren merkatuaren atzean izkutatzen dena lantzen du; batetik, museo zaintzaile baten aurkako epaiketa bat kontatzen du, eta, bestetik, garai mazedoniarreko lapurtutako urrezko koroa baten bilaketan murgiltzen da.
Juan Santos EHUko Aintzinako Historiako katedratikoak buru izan duen epaimahaiak Contiren zuzendaritzaren ausardia saritu du, bai eta muntaketaren kalitatea ere.
Apaizac Obeto, Arkeolan Saria
Apaizac Obeto, azken balea txaluparen kondaira dokumentalak Arkeolan Saria jaso zuen; zientzia dibulgaziorako filmarik hoberena nabarmentzen duen saria da. Jon Maia oriotarrak zuzendutako lana da, Orio Produkzioak-ek ekoitzitakoa. XVII. mendeko euskal bale arrantzaleek eginiko bidaia kontatzen du, haiena bezalako txalupa batean eginiko bidaia baliatuz; Pasaiako Ontziolan eraiki zuten txalupa.
Publikoaren Sari Berezia, bestela, Lehenengo europarrak (Les premiers Européens) ikus-entzunezkoak jaso zuen; filma frantsesa da, Axel Clevenotek zuzendutakoa. Duela bi milioi urtetik Europan izandako migrazioak aztertzen dituen dokumentala da, 106 minutuko iraupena duena.
