Gurpil poteoa eta kontzertua Gaztetxearen 11. urteurrena ospatzeko
Gaztetxearen 11. urteurrena ospatuko dute gaur hasita
Zabalenea II gaztetxeak 11 urte beteko ditu aurten, eta urtero moduan behar bezala ospatuko dute urteurrena. Horretarako, gaztetxeko kideek hainbat ekitaldi antolatu dituzte herriko gazte guztiei begira, gaur hasi eta datozen asteetarako.
Gaur, gurpil poteo informatiboa egingo dute Herriko Enparantzatik hasita. Patinak eta bizikletak ateratzeko eskatu diete herritarrei poteoa egiteko. Horrekin batera, datozen asteetarako prestatutako ekintzen berri emango diete. Gauean, berriz, musikari egingo diote tartea Sutura, The Fe Kaos eta talde sorpresarekin Zabalenea II gaztetxean bertan 22:30etik aurrera.
Hilaren 29an ekimen nagusia
Antolatzaileek Gazte Eguna ere izan dute oinarrian. Izan ere, uztailean egindako ekimen horretan, herriko gazteen arazoez hitz egiten aritu ziren, eta hala nola, sozioekonomia, kultura, aisialdia, errepresioa, hezkuntza, euskara eta komunikazioa izan ziren kezka gehien sortarazten zien gaiak.
Ekimen horretatik abiatuta, “gazte asanblada indartu eta zabaltzeko aukera paregabea” ikusi dute Zabalenea IIko kideek, eta horrenbestez, hausnarketa horren bideari jarraituz, hilaren 29rako hainbat ekintza prestatu dituzte. Ekitaldi nagusia goizean izango da, eta gazte eztaibadak egingo dituzte parte hartzaileen artean, uztailean hautemandako arazoez hitz egiteko.
Antolatzaileek herriko gazte guztiak animatu dituzte antolatutako ekimen guztietan parte hartzera.
Gaurko egitaraua
- Gaur
18:00etan. Gurpil poteo informatiboa Herriko Enparantzatik hasita. Patinak, bizikletak edo dena delakoa eramateko eskatu dute antolatzaileek.
22:30ean. Kontzertuak Gaztetxea: Sutura, The Fe Kaos eta talde sorpresa.
