Gipuzkoako Batzar Nagusiek absoluzioa eskatu dute Bateraguneko auzipetuentzat
Gipuzkoako Batzar Nagusietan, Bateragune auzia-ren gainean eztabaidatu zuten atzo, eta auzipetuentzako absoluzioa eskatzen duen testua atera zuten aurrera, gehiengoz: Bilduk, EAJk eta Aralarrek absoluzioaren alde bozkatu zuten (11 boto), eta PSE-EEk et...
Gipuzkoako Batzar Nagusietan, Bateragune auzia-ren gainean eztabaidatu zuten atzo, eta auzipetuentzako absoluzioa eskatzen duen testua atera zuten aurrera, gehiengoz: Bilduk, EAJk eta Aralarrek absoluzioaren alde bozkatu zuten (11 boto), eta PSE-EEk eta PPk, berriz, kontra (lau boto). Gaur emango du Bateragune auzia-ren epaia Espainiako Auzitegi Nagusiak. Filtrazio baten arabera, kartzela zigorrak izango dira Sonia Jacinto oreretarrarentzat eta Arnaldo Otegi, Rafa Diez, Miren Zabaleta eta Arkaitz Rodriguezentzat. Fiskaltzak hamarna urteko kartzela zigorra eskatu zuen Otegi eta Diezentzat, bederatzi Zabaletarentzat eta zortzina Jacinto eta Rodriguezentzat.
Atzo onartutako testuan salatu zuten Bateragune auzia epaiketa politiko bat dela, eta Espainiako Estatuari eskatu zioten auzi politikoen dinamika geratzeko, “ireki den aro berriari jartzen saiatzen ari diren oztopoak behin betiko amaituz”. Ildo horretatik, auzipetu guztientzako absoluzioa eskatu zuten.
Horrez gain, Gipuzkoako Batzar Nagusiek “bake eta normalizazio prozesua defendatu eta sustatzeko konpromisoa” azaldu zuten.
