San Juanek bigarren izatea lortu du Santanderreko banderan
Sanjuandarrek garaipena eskuetatik gertu izan zuten atzo Santanderreko uretan. Arrosak bigarren izan ziren San Miguel Ligam jokatu duten seigarren banderan (Bordeleko biak kenduta). Urdaibai izan zen trainerurik indartsuena Kantabriako hiriburuko uretan. Bost segundo atera zizkioten bermeotarrek sanjuandarrei.
Larunbatean ere Oarso Bidasoko traineruetako ordezkaririk onena izan ziren Donibanekoak. Laugarren postuan geratu ziren Marina de Cudeyoko banderan (Santanderreko badiaren ondoan dago herria). Bandera hori Kaikuk irabazi zuen. Sailkapen orokorreko laugarren postuan daude arrosak.
Hondarribia sailkapeneko goiko aldean aritu da bi estropadetan. Horrela, Marina de Cudeyon eta Santanderren bosgarren izan ziren berdeak. Sailkapen orokorrean ere bosgarren dira Mikel Orbañanosen mutilak. Gainera, Ioseba Amunarriz patroi onenaren sailkapenean lehenengo postuan dago. Kaxkarrago aritu ziren sanpedrotarrak: azkenaurren izan ziren larunbatean eta azkenak, berriz, atzoko estropadan.
Zumaia, lehenengo
Santanderren ere, EuskoTren Ligako jardunaldian Zumaia izan zen garaile. Segundo bateko aldea atera zion Galicia-Rias Baixas traineruari. Ziaboga txarra egin zuten galiziarrek eta larrutik ordaindu maniobra txar hori.
Herenegunera arte A taldeko estropada guztiak irabazi zituzten galiziarrek. Zumaiako traineruan Hibaikako neskek ere egiten dute arraun.
B Taldeko jardunaldia, berriz, larunbatean jokatu zuten Pedreñan (Kantabria, Espainia). Getaria-Tolosak irabazi zuen bandera eta sanjuandarrak bigarren izan ziren. Hondarribikoak, aldiz, azkeneko postuan sailkatu ziren.
KAE1en, Hondarribia B pattal
KAE1 Ligan, Bixigu Festaren Bandera jokatu zuten larunbatean Orion. Hondarribia Bk bederatzigarren postuan bukatu zuen Portugaletek irabazi zuen estropada. Atzo, berriz, itsasoaren egoerak azkenean utzi zuen Kaiarriba-Donostia Banderarengatik lehiatzen. Hamargarren izan ziren berdeak. Sailkapen orokorrean zortzigarren postuan daude Hondarribiko bigarren taldekoak.
KAE2 Ligako jardunaldirik ez zuten jokatu pasa den asteburuan. Asteburu honetan bi estropada jokatuko dituzte. Larunbatean Areetan (Bizkaia) jokatuko dute estropada. Igandean, berriz, etxean ariko da Hibaika, euren bandera jokatuko baita Pasaiako badiako uretan. 12:00etan hasiko da estropada.
