San Fermin Eguna, bero-bero
sanferminak 2011
Kamiotarrak txakolin dastaketan
Indartsu hasi dira aurtengo sanferminak. Euriak ez ditu festazaleak uxatu eta gauena giro ederra izan da Antxoko sanferminetan dituen gune nagusietan. Txikienak izan ziren atzo arratsean dantzan hasi ziren lehenak, Modestorekin, Axular plazan. Jada gauean, eta San Fermin bezperako afari oparoen ondotik, koadrila gehienak irten ziren parrandan. Azokan, 3gabe2 taldearekin dantza eta dantza ibili dira gazte eta ez hain gazteak, eta Zumardiko karpan ere, giroa ez da falta izan. Gaztetxean, berriz, erritmo gogorragoen zaleak bildu dira gaueko lehen orduan.
Egun handiaren bezpera izanik, festa ordu txikiak arte luzatu duenik ez zen falta izan eta euria egin arren, dianan bildu dira hamarnaka antxotar bingantxetarako bidean.
San Fermin egunean, eskaintza oparoa
Goiztiarrak eta gautxoriak. Denak batu dira kalean lehen orduan. Festetako egun handia izanik, Saltseroek hartu dituzte kaleak, txarangak lagunduta kalez kale giroa pizteko beren erritmo eta kantekin.
Bitartean, Axular Plazan, Amaia Agirregabiria alkateak aginte makila eman die alkate txikiei, herriaren gidaritza egun batez beren esku utzita.
Erraldoi eta buruhandiak Axular plazatik irteterako, uztailak zazpiarekin urtero plaza berean jotak entzun eta kantatzera biltzen den ikuslego fidela bertan zegoen zain. Klasikoa bihurtu da antxoko sanferminetako jaien egitarauan Voces Navarras taldearen emanaldia. Ordubete luzez jotak entzuten gustura aritu ziren antxotarrak.
Bitartean, Gure Zumardian, San fermin Eguneko beste klasikoa izan da. Txakolin dastaketan jende ugari bildu da eguerdian.
Arratsaldean haurren danborradak bilduko du jende gehien, 18:00etatik aurrera, Luzuriagatik abiatuta.
