Altzibarko etxebizitzen zozketako oinarriak, onartuta
Ezohiko udalbatzarra egin zuten atzo zinegotziek, Altzibarko Olalde eremuan eraikiko dituzten babes ofizialeko 90 etxebizitzak (garajeak eta trastelekuak barne) eskuratzeko baldintzak onartzeko. Hasteko, onartu zuten Udala izatea zozketa egingo duena. Udalak hitzarmena egin du Promociones Landurekin, etxebizitzen sustatzailearekin. Legeak baimentzen du Landuk berak zozkatzea etxebizitzak, baina bi aldeei egokiagoa iruditu zaie Udala izatea zozketa bideratuko duena, “prozesua gardenagoa izan dadin”. Hala, babes ofizialeko etxe horietako bat eskuratzeko, honako baldintzak bete beharko dituzte eskatzaileek: “2011ko urtarrilaren 1a baino lehen Oiartzunen erroldatuta egotea, edo azken 15 urteetan bost urtez erroldatuta egon izana; Etxebiden izena emanda egotea —ekainaren 25era arte eman ahal izango da izena—, eta 2009ko diru sarrerak hartuko dira kontuan, eta urte horretan babes ofizialeko etxebizitzentzat eskatzen ziren diru sarrera baldintzak bete beharko dira”. Oraingoz, 500 herritar inguru daude izena emanda Etxebiden. Horiek eta ekainaren 25era arte izena ematen dutenak zuzenean sartuko dira Altzibarko etxeen zozketan, baina aipatutako baldintzak bete beharko dituzte etxea eskuratu ahal izateko. Metodologia Zozketa publikoa izango da, gardentasun hori are gehiago bermatu nahian. Zozketarako, Etxebideren metodologia bera erabiliko du Udalak. Honela azaldu zuen Aitor Etxeberria alkateak: “Pertsona bat apuntatzen bada, zenbaki bat izango du edo bolatxo bat; bikoteek bi eta familiek hiru; zenbat eta pertsona gehiago, aukerak [...]
Ezohiko udalbatzarra egin zuten atzo zinegotziek, Altzibarko Olalde eremuan eraikiko dituzten babes ofizialeko 90 etxebizitzak (garajeak eta trastelekuak barne) eskuratzeko baldintzak onartzeko.
Hasteko, onartu zuten Udala izatea zozketa egingo duena. Udalak hitzarmena egin du Promociones Landurekin, etxebizitzen sustatzailearekin. Legeak baimentzen du Landuk berak zozkatzea etxebizitzak, baina bi aldeei egokiagoa iruditu zaie Udala izatea zozketa bideratuko duena, “prozesua gardenagoa izan dadin”.
Hala, babes ofizialeko etxe horietako bat eskuratzeko, honako baldintzak bete beharko dituzte eskatzaileek: “2011ko urtarrilaren 1a baino lehen Oiartzunen erroldatuta egotea, edo azken 15 urteetan bost urtez erroldatuta egon izana; Etxebiden izena emanda egotea —ekainaren 25era arte eman ahal izango da izena—, eta 2009ko diru sarrerak hartuko dira kontuan, eta urte horretan babes ofizialeko etxebizitzentzat eskatzen ziren diru sarrera baldintzak bete beharko dira”.
Oraingoz, 500 herritar inguru daude izena emanda Etxebiden. Horiek eta ekainaren 25era arte izena ematen dutenak zuzenean sartuko dira Altzibarko etxeen zozketan, baina aipatutako baldintzak bete beharko dituzte etxea eskuratu ahal izateko.
Metodologia
Zozketa publikoa izango da, gardentasun hori are gehiago bermatu nahian.
Zozketarako, Etxebideren metodologia bera erabiliko du Udalak. Honela azaldu zuen Aitor Etxeberria alkateak: “Pertsona bat apuntatzen bada, zenbaki bat izango du edo bolatxo bat; bikoteek bi eta familiek hiru; zenbat eta pertsona gehiago, aukerak ere”.
Esleipenak egin ondoren, baten batek egokitu zaion etxebizitza utziko balu, zerrendaren hurrenkera errespetatuko dute esleipen berriak egiteko. Alegia, lehenengoa atzera botatzen bada, 91.ak eskuratuko du etxea, eta horrela guztiak esleitu arte.
Esleitu ondoren, etxea tokatu zaienek aldaketak egin ahal izango dituzte: “Bati bi gelako etxea tokatu bazaio eta beste batzuei hirukoa, baina ados ez badaude eta aldatu nahi badute, trukatzeko aukera izango dute”. Bi aldeak akordiora iritsiz gero, egin daitezke halako aldaketak, eta Etxebidek eta Udalak onartu izan dituzte.
Atzoko udalbatzarreko Altzibarko proiektuari buruzko gai zerrendako puntu guztiak aho batez onartu zituzten udaletxean elkartu ziren zeuden zinegotziek (Gobernu Taldeko zazpiek eta OBko biek).
