Lonjaren proiektuaren gaineko asanblea deitu dute biharko
Lonja berriaren proiektuaren gainean lan egiteko San Pedron eratu zen Lonja Batzordeak herritarrak deitu ditu biharko (hilak 30), asanbleara. 19:30ean bilduko dira, Udal Aretoan. Lehengo martxoaren 7an, Portu Agintaritzako buru Miguel Buenek lonjaren...
Lonja berriaren proiektuaren gainean lan egiteko San Pedron eratu zen Lonja Batzordeak herritarrak deitu ditu biharko (hilak 30), asanbleara. 19:30ean bilduko dira, Udal Aretoan.
Lehengo martxoaren 7an, Portu Agintaritzako buru Miguel Buenek lonjaren proiektua entregatu dutela eta apirilean lanak hasiko direla iragarri zuen. Azken albisteen harira, prozesuaren jarraipena egiteko eratu zen Batzordeak, beharrezkotzat jo du asanblea deitzea, «proiektua une hauetan zertan den ezagutzera emateko, adostutakoak zein neurrian onartzen diren ezagutzeko, eta hala egokituko balitz, aurrerantzean egin beharreko urratsak zehazteko».
San Pedrorako aukera
Lonjako Batzordearen iritziz, lonja berritzea aukera ona da San Pedrorentzat, espazio fisikoa beharrezkoa duelako eta sozio ekonomikoki indartu daitekeelako, baina oso garrantzitsutzat jotzen du San Pedrok dituen beharrak proiektuan txartatzeari. Gaiaren garrantzia dela eta herritarrak parte hartzera deitu du Lonjako Batzordeak.
