LZPk kaltetutako herritarrek asanblada sortu dute
Donostialdeko Lurraldeko Zatikako Planak (LZP) Oarsoaldeko eta Bidasoko udalerri guztiei eragingo die (Donostialdekoekin batera hamahiru udalerri dira guztira). Gipuzkoako Foru Aldundiak hasierako onarpena eman ondoren, urtarrilaren 20an bukatu zen plan horri alegazioak egiteko epea. Helegitea jarri duten norbanako eta eragileetako batzuek LZPk Kaltetutako Herritarren Asanblada edo Batzordea sortu dute.
Gaur aurkeztu dute Donostiako Koldo Mitxelena Kulturgunean. Bertan Oarsoaldeko eta Bidasoaldeko hainbat bizilagun zeuden.
Jakinarazi zutenez, guztira 14.000 alegazio aurkeztu zaizkio LZPri, gehienak norbanakoenak. Ehun taldek ere jarri dituzte helegiteak. Horien artean daude erakundeak, auzo elkarteak edo bestelako eragileak.
“Plangintza horren hainbat proposamenei herritarrek eman dioten erantzunak ez du aurrekaririk”, nabarmendu dute asanbladako kideek. Horrela, planean dauden egitasmoetatik aurkakotasun handiena jaso duena bigarren gerrikoa Lapurdiraino hedatzea izan dela adierazi dute. 14.000 helegiteetatik 13.000k du bigarren gerrikoarekin zerikusia. Helegite horiek bigarren gerrikoaren kontrakoak soilik izan dira, baina alegazio zabalagoak aurkeztu dituztenean ere bigarren gerrikoaren kontrako jarrera sarritan agertu da.
“Geroz eta gehiago gara horrelako bizi kalitatearen aurkako proposamen suntsitzaile eta diru xahutzaileetan sinisten ez dugunak”, esan dute. Apirilaren 2rako elkarretaratzea deitu dute, Donostian, Aldundiaren eta Eusko Jaurlaritzaren ordezkaritzaren aurrean, 12:00etan, “LZPak guztiok kaltetzen gaituelako”. LZPren gaineko informazioa erakutsiko dute halaber.
