Talaiako garbigune berria egiteko lurra utzi dio Udalak Mankomunitateari
2.000 metro koadro inguruko eremua da; garbigune zerbitzua «oraindik hobea» izango dela dio Udalak
Hilaren hasieran iragarri zuenez, behin betiko garbigunea eraikiko du San Markoko Mankomunitateak Talaia poligonoan, egun Udalaren garbigunea dagoen lekuan. Udaletik jakinarazi dutenez, Udalak berak eskatu dio Mankomunitateari garbigune berria egiteko eta proiektua dagoeneko onartu du San Markoko batzarrak (pasa den asteazkeneko ohiko batzarrean, hain zuzen ere). San Markoko Mankomunitateak garbigunea eraikitzeko lanak bere gain hartuko ditu, baita kudeaketa ere.
Garbigunea eraiki ahal izateko, Udalak lur eremu bat utziko dio Mankomunitateari. 2.000 metro koadro inguruko eremua da, eta hamar urterako utziko dio, dohainik. Trukean, Oiartzungo Udalak Mankomunitateari baldintza bat jarri dio: «Eskainiko duen zerbitzua Oiartzungo herriari eskaintzea». Hala ere, Oiartzungo bizilagunez gain, eskualdeko gainerako herrietako bizilagunek ere erabili ahal izango dute Talaiako garbigune berria, eraikitzen denean.
Otsaileko ohiko udalbatzarrean onartuko dute lurraren kontzesioa egitea. Eusko Jaurlaritzak, dagoeneko, oniritzia eman dio jarduera baimenari.
Garbigunearen «arrakasta»
Garbigune berriari esker, orain arte oiartzuarrei eskaini zaien garbigune zerbitzua «oraindik hobea» izango dela nabarmendu dute Udaletik.
Atez ateko bilketa martxan jartzearekin batera, etxeko noizbehinkako hondakin handiak eta arriskutsuak uzteko behin-behineko garbigunea jarri zuen Udalak Talaia poligonoan. Herritarren artean oso harrera ona izan du: «Horren adierazgarri da, besteak beste, maiatzaren 23tik bertan bildu den hondakin kopurua: 188.479 kilotik gora jaso dira».
Hasieran egindako aurreikuspenak gainditu dituzte datu horiek eta Udalak eremua handitu behar izan du, «hasieran prestatutako eremua bikoiztuz». Garbigune berria, behin betiko azpiegitura izango da.
Hondakin berezientzako
Udaletik gogorarazi dutenez, garbigunea etxeko hondakin bereziak biltzeko prestatutako eremua da. Bertan jasotzen dira egurra; material elektrikoa eta elektronikoa; altzariak; material toxikoa; obra txikien hondakinak; txatarra…
Langile autonomoen edo gisakoen hondakinak, bestalde, ez dira jasotzen garbigunean. Horientzako garbigune berezia San Markosen bertan dago.
Garbigunearen ordutegia ere gogorarazi dute: astelehenetik larunbatera 10:00etatik 13:00etara dago irekita, baita astearte, asteazken eta ostiral arratsaldeetan ere, 17:00etatik 20:00etara.
