SMSen bosgarren lehiaketan parte hartzeko epea zabalduko dute bihar
Eskualdeko nerabeek sms lehiaketan parte hartzeko aukera izango dute gaurtik aurrera. Oarsoaldea Euskara Batzordeak antolatzen duen lehiaketaren bosgarren ekitaldia izango da aurtengoa.
Lehiaketan parte hartzeko bidali beharreko testuaren gaia ere zehaztu du Oarsoaldeko Euskara Batzordeak. Horrela, gustuko duten pertsona zinemara, kontzertu batera edo antzeko jarduera batera gonbidatzeko sms-a bidali beharko dute telefono, e-posta edo webgune bidez parte hartu nahi duten gaztetxoek.
Nahi adina mezu
Nahi adina mezu bidal daitezke lehiaketan parte hartzeko asmoz. Horrela, 660 387 044 telefono zenbakira edo sms@oarsoaldea.net mezu bat bidalita posta elektronikoko helbidera edota www.oarsoarrak.net webgunean galdetegia beteta parte hartu daiteke. Telefono bidez bidalita, 15 xentimoko kostua izango du.
Beti bezala, baldintza jakin batzuk bete behar dituzte gazteek: Oarsoaldekoa izatea, mezua euskaraz idatzita egotea, sms-aren karaktere kopurua 30etik ez pasatzea eta garapen agentziak ezarritako gaia betetzea.
Lezoko, Errenteria-Oreretako, Pasaiako eta Oiartzungo Derrigorrezko Bigarren Hezkuntzako laugarren mailako ikasleek aukeratuko dute sms-rik onena. Apirilaren 1ean, prentsaurreko batean, iragarriko dute nor den irabazlea eta bertan egingo dute sari banaketa. Lehiaketaren irabazleak Oarsoaldeko dendetan erosteko 300 euroko balioa duen txartela jasoko du.
