Irungo manifestazioa, arratsaldean
Gaurko grebak «jarraipen handia» izan duela adierazi dute Xabier Perez Bidasoako eta Oarsoaldeko ELAko ordezkariak, baita Zorion Ortigosa LABeko ordezkariak ere. “Oro har jarraipen handia izan du grebak. Sektorearen arabera, eragin handiagoa izan du leku batzuetan besteetan baino”, zehaztu dute bi ordezkariek. Horrez gain, Irunen eta Errenteria-Oreretan egindako manifestazioetan jendetza elkartu dela gaineratu dute. Hala, Errenteria-Oreretan 2.000 pertsona inguru bildu dira 18:00etan Herriko Enparantzatik abiatu den manifestazioan. Irungoa ere oso jendetsua izan da.
ELA, LAB, EILAS, EHNE eta Hiru sindikatuek egindako deialdiak, eraginik handiena industrian izan duela nabarmendu dute bi sindikatuetako ordezkariek: “Enpresa handietan %90ak egin du greba. Txikietan, aldiz, denetik egon da. Gutxi gorabehera enpresa txikien %60k egin duela greba esan dezakegu”.
Industrian gehienbat
Oarsoaldean Lezoko, Oiartzungo eta Errenteria-Oreretako industrialdeetako enpresa gehienak itxita egon dira. Pasaiako portua «guztiz itxita» egon da baita ere. «Ez da itsasontzirik sartu edo irten Pasaiatik eta garabiak ere geldi egon dira», esan du LABeko Ortigosak. Era berean, Papresan (Errenteria-Oreretan dago), langileen %75k bat egin zuen grebarekin. Niessen enpresan, esaterako, erabatekoa izan zen geldialdia. Bidasoan, berriz, eragina ez da hain handia izan, baina Perezen arabera, «Bidasoko herritarrak ere konturatu dira pentsioen erreformaren larritasunaz, eta askok bat egin dute grebarekin». Hala, Palmera eta CAF enpresak itxita egon direla nabarmendu du Perezek.
Komertzioari dagokionez, Oarsoaldean grebaren jarraipena «ia erabatekoa» izan da nabarmendu dute LABeko eta ELAko ordezkariek: «Irunen piketeak igarotzen zirenean itxi egiten zuten merkatariek, baina handik gutxira berriz ere zabaltzen zituzten jabeek zenbait denda». Hondarribin %50ean itxi dituzte dendak.
Aparteko istilurik ez
Ez da aparteko istilurik izan Oarsoaldean ezta Bidasoan ere. Hala ere, Ertzaintzaren arabera, Oiartzungo enpresa baten atarian hainbat ezezagunek kalteak eragin dituzte, baita zenbait autoren gurpilak zulatu ere. Era berean, Pasaian, etxetresna elektrikoen denda batean piketeek kalte arinak eragin dituztela gaineratu du Ertzaintzak.
Pikete informatiboek euren lana egin dute, Ertzaintzak zaintza lanak egin dituen bitartean. Zenbait tokitan tentsio uneak izan badira ere (Irunen batik bat, erdialdean), ez da istilu larriegirik izan egunean zehar.
Gutxieneko zerbitzuak eta telebista
Garraioan, Renfeko, Euskotreneko, Herribuseko, Hondarribiko nahiz Irungo autobus lineek gutxieneko zerbitzuak bete dituzte. LABeko Zorion Ortigosaren ustez, “gutxieneko zerbitzuek grebaren eragina desitxuratu dute”. Horrez gain, azken bi grebetan zerbitzu minimoak “gehiegizkoak” izateagatik salaketak jarri, epaiketa egin eta irabazi ondoren, Jaurlaritzak sindikatuen aldeko sententzia ez duela aintzat hartu adierazi du: “Igandetako zerbitzuen antzekoak dira ezarritako minimoak”.
Osakidetzako gutxieneko zerbitzuei buruz ere iritzi bera dute sindikatuetako ordezkariek. “Garraio publikoarekin gertatzen den bezala, Osakidetzan ere grebaren jarraipena desitxuratu egiten da. Zerbitzu minimoak ez direlako minimoak”.
Bestalde, telebistek grebari eskainitako arreta «distortsionatua» dela gaineratu dute LAB sindikatutik.
