Aritz Gonzalez, Aitor Murillo eta Kerman Irigoien dira; 11:00etan aterako dira etzi Ugaldetxotik
Oiartzun apustu zale herria izaki, dagoeneko antolatu dute urteko lehenengo desafioa. Bizikletan, Ugaldetxotik Bianditzera zein lehenago iritsi egin dute apustua. Etzi egingo dute eta hiru gazte lehiatuko dira.
Aritz Gonzalez, Aitor Murillo eta Kerman Irigoien dira parte-hartzaileak. Ugaldetxotik aterako dira 11:00etan, futbol zelaiaren pareko aparkalekutik (gutxi gorabehera bertan markatuko dute irteera marra).
Bianditzera lehenengo iristen denak irabaziko du apustua, baina baita bere alde egindako guztiek ere.
Lagunen parte-hartzea
Aipatutako hiru txirrindularien alde egin dute lagunek. Hala, hiru txirrindulariek dituzte jarraitzaileak.
Behin apustua bukatuta, bazkaria egingo dute guztiek Ugaldetxoko Intxixu tabernan. Irabazlearen alde egin dutenek ere apustua irabaziko dute, eta galtzailearen alde egin dutenak ere galtzen aterako dira.
Hau da, irabazi duenak eta bere alde egin dutenek ez dute bazkaria ordaindu beharko. Bigarren gelditu denak eta haren alde egin dutenek, norberak bere bazkaria ordaindu beharko du. Galdu duen txirrindulariak eta bere alde apustua egin dutenek, azkenik, beraien bazkaria eta irabazlearen taldearena ordaindu beharko dute.
Argazkiak, bideoa, motorrak…
Ondo antolatutako apustua izango da biharkoa. Izan ere, txirrindulariek laguntza izango dute, euren ondoan motorrean joango baitira lagunak. Baina ez dira laguntzera bakarrik joango, argazkiak eta bideoak ateratzeko asmoa ere badute. Hiru bideo kamera izango dituzte, esaterako, eta beste hainbeste argazki kamera.
Apustuarekin eta ondorengo jaiarekin DVDa osatu nahi dute, pasatutako eguna ez ahazteko.
