Gernikako akordioa ezagutaraziko dute Errenterian
Datozen bi asteotan Gernikako akordioa zabaldu eta atxikimenduak biltzeko kanpaina egingo dute Errenteria-Oreretan. Bihar bertan hasiko da kanpaina, Zentro Elkartean egingo duten bilkurarekin. Bertan, atxikimenduak bilduko dituzte. Hurrengo hitzordua, ...
Datozen bi asteotan Gernikako akordioa zabaldu eta atxikimenduak biltzeko kanpaina egingo dute Errenteria-Oreretan. Bihar bertan hasiko da kanpaina, Zentro Elkartean egingo duten bilkurarekin. Bertan, atxikimenduak bilduko dituzte. Hurrengo hitzordua, berriz, hilaren 21ean jarri dute, Xenpelar kultur etxean. Bertan agerraldi publikoa egitea da asmoa, akordiora atxikitutako eragile nahiz elkarte guztiekin batera. Bi ekimenak arratsaldeko zazpietan hasiko dira.
Akordioaren sinatzaileek osatutako kanpaina da. Hala, jakinarazi dute norbaitek hitzarmenarekin bat egiten baldin badu, baina biharko hitzordura joan ezin baldin badu oreretangernika@hotmail.com posta elektronikoaren bidez batu ahal izango zaiola. Hori bai, agerraldiaren dataren aurretik eman beharko du izena. Antolatzaileek “Euskal Herriko gatazka aterabide demokratikoen bidez konpontzeko orriarekiko atxikimenduaren zain” geratuko direla esan dute.
Ibilbide orria
Gernikako akordioa sinatu duten herritarrek gogorarazi dute Bake bidean aterabide demokratikoen akordioa (Gernikako akordioa) ez dela adiearazpen hutsala, ibilbide orria baizik: “Eragile guztien jarduera politikoa normalizatzea du helburu, handik elkarrizketa eta negoziazio prozesu bati hasiera emateko. Horregatik, bai ETAri baita Espainiako Gobernuari ere eskaera zehatzak egiten zaizkie, elkarrizketa prozesu horretarako baldintzak sor ditzaten”.
Ildo horretatik, hitzarmen horren helburu nagusiak “gatazka politikoa konpontzeko bidean pausoak ematea, aukera politiko guztien jarduerarako gutxieneko baldintza demokratikoak ezartzea eta euskal herritar guztientzako eskubidea aitortzea eta errespetatzea” direla jakinarazi dute.
