Euskadiko Kutxarekin ere sinatu du hitzarmena Oiartzungo Udalak
UEMAko 40 udalek Gipuzkoako Kutxarekin eta Euskadikoaren sinatutako hitzarmena bost urterako da
UEMAk (Udalerri Euskaldunen Mankomunitateak) eta UEMAko 40 udalek hitzarmena sinatu dute Gipuzkoako Kutxarekin eta Euskadiko Kutxarekin, tartean Oiartzungo Udalak. Pasa den astean argitaratu genuen Udalak Gipuzkoako Kutxarekin sinatu zuela hitzarmena, baina Euskadiko Kutxarekin ere sinatu du.
Hitzarmenaren bidez, bi finantza erakundeek konpromisoa hartu dute UEMAko udalerrietan eskaintzen dituzten komunikazio guztiak euskaraz egiteko. Hitzarmenean, konpromiso zehatzak daude, eta bost urteren buruan osorik betetzea aurreikusten dute.
Kutxa biek hartutako konpromiso nagusiak honako hauek dira: langile finkoak zein aldi baterakoak euskaldunak izatea eta behar bezala prestatuta egotea komunikazioak euskaraz ondo eskaintzeko; bezeroei lehen hitza euskaraz egitea; bezeroek produktuak kontratatzen dituztenean eskaintza euskaraz egitea; txartelak euskaraz sortzea kontrakoa esan ezean; euskara erabiltzeko sustapena era desberdinez egitea; publizitatea, kartelak eta esku orriak euskaraz egotea eta lehentasuna izatea; libreta eta kontuetako idazpenak euskaraz egotea…
Bost urtetako iraupena duen hitzarmen honen jarraipena egiteko, urtero helburu zehatzak ezarriko ditu UEMAk eta bilakaera nola doan ikusteko, hizkuntza neurketa zehatza egingo du udal hauetan.
Sinatzaileak
Finantza erakundeen aldetik, hitzarmena Jon Arraiza Gipuzkoako Kutxako zuzendariorde eta marketing arloko zuzendariak eta Juan Mari Osteriz Euskadiko Kutxako Gipuzkoa-Kostaldeko Lurraldeko zuzendariak sinatu dute; eta, beste aldetik, Jon Bollar UEMAko lehendakariak eta 40 udaletako ordezkariek (tartean Oiartzungo zinegotzi Jabi Elizasuk).
UEMAtik jakinarazi dutenez, sinatzaileen kopuruak gora egingo du hurrengo asteetan, UEMAko beste udal batzuekin.
Euskaraz erregistratzeko
Hitzarmen hori sinatzearekin batera, UEMAk Batzar Nagusia egin du. Bertan, haurrak euskaraz erregistratzearen aldeko mozioa onartu du. Izan ere, gaur egun EAE Euskal Autonomia Erkidegoko 230tik gora bake epaitegietan ezin dira jaioberriak euskaraz erregistratu, eta UEMAk dagokien erakundeei neurriak hartzeko eskatu die.
Irudian, eskuinean, Jabi Elizasu Oiartzungo zinegotzia, hitzarmena sinatzen.
