Pasa den astean arratoiak ugaritu zirela salatu zuten ezker abertzaleak eta Ezker Batuak, eta Errenteriako Udalari arazoak konpontzeko eskatuz. Udalak arratoi garbiketaz arduratzen den enpresarengana jo du, eta aholku argia eman die: ibaian bizi diren ...
Pasa den astean arratoiak ugaritu zirela salatu zuten ezker abertzaleak eta Ezker Batuak, eta Errenteriako Udalari arazoak konpontzeko eskatuz. Udalak arratoi garbiketaz arduratzen den enpresarengana jo du, eta aholku argia eman die: ibaian bizi diren animaliei jaten ez emateko. Horrenbestez, herritarrengana zuzendu dira horrelakorik ez egiteko eskatuz.
Udalak aitortu du Gabierrota eta Fanderia inguruan arratoien presentzia ugaritu egin dela, eta behar baino gehiagotan ikusi ahal izan direla. Egoera horren berri eman dieten herritarrei ere eskerrak eman dizkiete.
Hala, arratoi garbiketaz arduratzen den enpresarengana jo ondoren, jakinarazi dute beharrezkoa dela ibaian bizi diren animaliei jaten ez ematea, «janari arrastoak baitira arratoiak toki horietan kontzentratzeko arrazoietako bat».
Horrenbestez, herritarrei «zibismoz eta erantzukizunez» jarduteko deia egin diete Udaletik, izurriteen kontrako enpresak egindako aholku hori betetzeko.
Bestetik, gogorarazi dute urte osoan zehar arratoiak garbitzeko kanpainak egiten dituztela Errenteria-Oreretako auzo eta gune guztietan: «Egia da arratoi garbiketa kanpaina horiek espazio irekietan egiten direla, baina egia da ere kontuz ibili behar dela arratoiak hiltzeko erabiltzen diren produktu horiek beste espezieei eta pertsonei ez eragiteko». Hori dela eta, kanpainez gain herritarren laguntza ere beharrezkoa dela adierazi dute.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
