Antzerki zaleentzako zita izango da asteburu honetan Hondarribian beste behin. Izan ere, azaroko lehenengo asteburuan 8 begi eta Tocata y fuga antzezlanak izan dira herrian, eta larunbat honetan Arrastoa Txalo antzerki taldearen lana izango da arratsaldeko 19:30ean Amuteko Auzo Elkartean. Asteburuko zita Udal Euskara Batzordeak antolatu du Neguko Jardunaldien barruan. Oraingoan, Txalo Produkzioak Arrastoa taularatuko du Ramon Agirre eta Asier Hormaza protagonista nagusiekin. Lehenak egin du egokitzapena. Bere esanetan, Arrastoa, «film bat bezala ikusten da, oso entretenigarria da, borroko fisikoa eta pistola bat ere badaude tartean». Asier Hormazak dioenez, «ironiaz betetako testua da eta tentsioa mantentzen du etengabe».
Euskarazkoan, baina, jatorriz bi ordutik gorako iraupena duen antzezlana ordu eta erdi eskasera moldatu du Txalo ekoiztetxeak. Ramon Agirreren kasuan, aktore lanekin nahikoa ez, eta itzulpen eta egokitzapen lanak ere egin ditu. «Halako istorioetan ez da oso erraza izaten oinarrian duen umorea mantentzen eta, era berean, gaur eguneko hizkerara moldatzen. Hala ere, jatorrizko oinarriari eusten ahalegindu gara».
Iruzur eta ironiarik ez da falta Txalo ekoiztetxeak dakarren antzezlan berrian. Indartsu eta ilusioz beteta dator, umore ingelesaren onena emateko prest. Arrastoa antzezlana gauzak esateko modua eta elkarrizketen erabilera arrakastaz josten dituzten horietakoa da. Horregatik ezagutuko du batek baino gehiagok Anthony Shafferen Sleuth antzerkian oinarria duen obra hau. Begoña Bilbaoren zuzendaritzapean, euskaraz estreinatuko dute larunbatean Hondarribiko Amuteko Auzo Elkartean.
