Eskualdeko bi ordezkari, Euskal Kantu txapelketaren finalean
Igandean jokatuko dute, Donostiako Antzoki Zaharrean, Gipuzkoako Euskal Kantu Txapelketaren XIV. ekitaldiaren finala. Bertan, eskualdeko bi ordezkarik hartuko dute parte: Lorea Intxaurrandieta lezoarrak eta Eneko Fraile errenteriarrak. Pasa den igand...
Igandean jokatuko dute, Donostiako Antzoki Zaharrean, Gipuzkoako Euskal Kantu Txapelketaren XIV. ekitaldiaren finala. Bertan, eskualdeko bi ordezkarik hartuko dute parte: Lorea Intxaurrandieta lezoarrak eta Eneko Fraile errenteriarrak. Pasa den igandean lortu zituzten finalerako txartelak, Urretxuko Labeaga aretoan jokatu zen final aurrekoan.
Guztira hamasei abesti entzun ahal izango dituzte igandean, 18:00etatik aurrera, Antzoki Zaharrean izango direnek. Hamar bakarlari igoko dira oholtzara, lau bikote eta bi talde.
Lorea Intxaurrandieta bosgarrena izango da. Berak sortu duen Natura kanta abestuko du. Eneko Fraile, berriz, hamargarrena izango da. Berak ere abestia sortu du: Zeru gainean. Hala ere, denak ez dira parte-hartzaileek sortu dituzten abestiak izango. Musikari ezagunen abestiak taularatuko dituzte batzuek.
Disko berria aurkeztuko dute
Bestalde, Kantagintzaren uhin berria 2010 diskoa aurkeztuko dute igandeko finalean. Iazko txapelketan aurkeztu zituzten kanta berriak eta saritutakoak bildu dituzte disko horretan. Irati Odriozola oiartzuarraren abesti bat dago bertan. Ordizian iazko irailaren 4an egin zuten kantaldian zuzenean grabatu zuten diskoa. Igandean bertan eros daiteke.
