Irunek Mahai Tenisaren Teknifikazio Zentroa izango du, Gain Gainean parkean
Ostiralean aurkeztu zuten Udaleko Obra arduradun Miguel Angel Paezek eta Kirol zinegotzi Belen Sierrak Irungo Mahai Teniseko Teknifikazio Zentroaren proiektua, asteazkenean Tokiko Gobernu Batzarrak onartu eta gero. Gain Gainean parkean kokatuko da, Olaketa kaleko 25. zenbakiaren ondoan. Eremu hori eta Prudencia Arbide kalea lotzeko balio izango dute obrek, hots, iaz inauguratutako parkearen sarrerari zentzua emanez.
2008ko azaroan Gain Gainean esparrua antolatzeko Plan Berezia onartu zuen udalbatzak, eta iaz Udaleko Obrako eta Kirolaren Udal Patronatuko arduradunek Mahai Teniseko Teknifikazio Zentrorako leku aproposa zela adostu zuten. ABE+Arquitectos enpresaren diseinuak ingurune maldatsua kontuan izateaz gain, Mahai Teniseko nazioarteko federazioaren arau teknikoen ezaugarri guztiak aintzat hartu ditu. Belen Sierra Kirol Patronatuaren presidenteak adierazi du eraikinak «mahai tenisaren alde Leka Enea taldeak egin duen lan sakon eta handiari amaiera» emango diola. Sierraren ustez, «instalazio egokia behar zuen jende gaztea prestatzen jarraitzeko eta kategoria hoberenen mailako lehiaketa handiak erakarri ahal izateko».
Prudencia Arbide kalea eta Olaketako etxe berriak lotzeko balioko dute obrek
