Hiri agenteek Hondarribia hobetzeko lan egingo dute
Egunotan Hondarribiko Udala hiritarrek herriari eragiten dioten ekintzei buruz dituzten iritziak jasotzen ari da. Hori dela eta agente bidez hiritarrek parte hartzeko bide berri bat sustatu nahi dute; hondarribiarrek herriari buruz dituzten iritziak eta eskaerak jasotzeko aukera emango dute, eta gainera Hondarribian antolatzen diren ekitaldi eta jardueren gaineko informazioa emango dute. Azaroan zehar GUREAK enpresak kontratatutako bi langile Hondarribiko kaleetan zehar ibiliko dira sei hilabetez zenbait lan egiten: Hiritarren kezka eta iradokizunak jasotzen, udal jardueren berri ematen, animalien ordenantzaren berri ematen, eta hiri altzariak hondatuak diren aztertzen.
Programa honen bidez, Bidasoa Bizirik erakundeak sustatutako Behe Bidasoarako Eskualde Plan Orokorraren barruan, Hondarribian hamabost lanpostu sortzea eskatu dute; prestaziorik kobratzen ez duten edo diru-sarrerak bermatzeko errenta jasotzen ez duten pertsonei zuzenduak dira, eta Hondarribian bizi direnek lehentasuna izango dute. Enplegu hauen iraupena gehienez 6 hilabetekoa izango da, egun osoz, eta behar berriei aurre egiteko balio izango du.
Aitor Kerejetak, Hondarribiko alkateak azaldu duenez, “Udalaren asmoa programa honetan sartzerakoan herrian behar handiena duten pertsonen egoera arintzea eta lan merkatuan sartzea erraztea”. Era berean, Udalak azpikontratatutako enpresek eta lana herrian egiten duten beste zenbait erakundek eta elkartek Planean sartzea eskatu dute, beste 24 lanpostutarako; hauek ere pertsona multzo berari zuzenduak dira.
