Lortu arte astelehenero elkarretaratuko dira
Larunbatean Txingudiko Pentsiodunen Mugimenduak deituta Irunen egingo den manifestazioarekin bat egin dute Hondarribiko erretiratuek.
Pentsio justuen alde elkarretaratu dira gaur ere Kasino Zaharrean
Beste behin dozenaka hondarribiar elkartu dira gaur eguerdian Kasino Zaharrean pentsio justuak nahi dituztela adierazteko. “Gaurko eta etorkizuneko pentsiodunentzako bizitza duina bermatuko duen sistema publikoaren alde” kontzentratu dira, eta eskaera hori astelehenero kaleratuko dute, baldin eta Espainiako gobernuak ez badu ?0,25eko igoera ezartzeko asmoan atzera egiten.
Apirileko plana zehaztu dute gaurko bilkuran. Astelehenero elkarretaratuko dira bertan, 12:00etan hasita, ordu erdiz. Azken hamar minutuetarako Damarri plazara jaitsiko dira, errepidearen ondoan jarriz. Hileko azken astelehenean, 30ean, manifestazioa egingo dute bilkuraren ordez; Kasino Zaharretik abiatuta eta San Pedro kalerainoko bidea egingo dute, pentsio justuen aldarria Porturaino eramanez.
Gainera, larunbatean (hilak 14), Txingudiko Pentsiodunen Mugimenduak deituta Irunen egingo den manifestazioarekin bat egin dute Hondarribiko erretiratuek. Pentsioen igoera KPIaren arabera, pobrezia ataritik behera inongo pentsiorik ez egotea, eta gizon eta emakumeen arteko pentsioen arrakala deuseztea eskatuko dute, besteak beste. 18:00etan abiatuko da protesta, San Juan plazatik.