Abel Zabala Elizazu: 'Irungo Harrera Sarea'
Irunabar Irungo Bertsoaren Bilgunearen eta HITZAren elkarlanaren harira, Abel Zabala Elizazuk bertso sorta egin du. Honakoak dira hark egindakoak, Irungo Harrera Sarea hizpide:
Irungo Harrera Sarea
Doinua: ‘Kintak jarrita ondorenian (Kubako gerrarenak).’
1.
Eskualdean bada talde bat
Irungo Harrera Sarea
migranteekin egiten du lan
ederra, paregabea
haiek artatuz haiek lagunduz
haiei goxatuz bidea
bere jarduna plazaratzea
nire sortaren xedea.
2.
Bi mila eta hemezortziko
udako egun batean
hainbat migrante agertu ziren
Renfe geltokiko atean
egun batzuek pasa zituzten
haiek artatu arte han
ez genekien zenbat gehiago
helduko ziren artean.
3.
Geroztik zifrak gora egin du
azkarrago, mantsoago
eta milaka etorri dira
hori begi bixtan dago
bi mila eta hogei urtean
bi mila baino gehiago
baina tamalez egoera honek
jarraituko du luzaro.
4.
Frantzia edo Alemania
migratearen jomuga
baina zubia zeharkatzea
zer nolako abentura
Hendaialdean harrapatuak
dira gaizkile modura
ta poliziak berriz Iruna
bueltatzea seguru da.
5.
Gobernuz kanpo dauden taldeek
jarri zuten interesa
ordezkatzeko agintariek
emandako erantzun eza
ordutik hona bidea noski
ez da izan hain erreza
gure artera heldu den orok
eduki dezan babesa.
6.
Hiru taldetan banatzen dute
euren jardueren zama
Gautxorikoak joaten dira
geltokira haiengana
Harrerakoek banatzen dute
informazio andana
eta arropa arduradunek
arropa batzeko lana.
7.
Gautxorikoen jarduna noski
kontuan hartu beharko
geltokiraino joaten dira
busa datorrenerako
ahal den azkarren artatu oso
garrantzitsua delako
pasatzaileen eskutan laister
erori daitezkelako.
8.
Harrerakoen taldean ere
bada hainbat jende prestu
noski ederki dakite jakin
pertsona nola babestu
galderarikan inork badauka
ba erantzuna erreztu
eta planorik behar badute
jartzen dute haien esku.
9.
Look aldaketak edo itxurak
ez du garrantzi gutxi (e)ta
aldagelara egiten dute
ezinbesteko bixita
eta handikan irteten dira
egokiago jantzita
migrantearen uniformea
alde batera utzita.
10.
Bolondres hauen jokabideak
badu nahikoa meritu
debalde ze lan egiten duten
hemen ezin da kabitu
eta norbaitek bere ekintzaz
lagundu nahiko balitu
udaletxeko aurrekaldean
hantxe topatuko ditu.
