Irunabar Irungo Bertsoaren Bilgunearen eta HITZAren elkarlanaren harira, Igauri Lopetegi Amostegik bertso sorta egin du. Honakoak dira hark egindakoak:
Doinua: ‘Naufragoarena’.
Hau eta hura, hemen eta han
1.
Urpeko hotsa, lurreko lotsa,
titular triste baten aitortza,
ta hemen bertan bizi den haren
entzungorrale zikoitza.
Nola zaie hain arrotza
egunekiko morrontza,
hemen ito den bakoitza?
Bihurtu baita, eta gu gaitu
eten beharrik bihotza,
aste arteko berri arrunt bat
migranteen heriotza.
2.
Batzuen bizi, biziraupena,
ez denez bizi itxaropena
zer da bizitza, bizi beharra
edo bizitzeko pena?
Azkena eta aurrena
zenbat ta zenbatgarrena
putzu hauetan barrena?
Guk hemen ere entzuten dugu
hango “I can’t breath”-arena.
Sakona bezain zabala den hau
da putzurik handiena.
3.
Jabe ez dena da kanpotarra.
Eurek legea, eurek indarra.
Baina gurea da amorrua,
borondatea, negarra.
Jauzi bat batzuk iparra,
hautsita mugako marra.
Auzia zein da? Biharra:
Irtenbide bat bi arazook
konpontzekotan bakarra,
Inork jauzirik ezin emana
ta jauzi egin beharra.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Hiriko euskarazko komunitatearen parte izan nahi dudalako. Bidasoak eta bidasoarrok behar dugulako.
