Super botere zuriak
Mali duzu sorlekua, 26 udaberri eta 26 negugorri dituzu. Bidea hasi zenuen, mugaz muga, gogor, tinko. Beldurrak hegoak eman zizkion zure ausardiari. Gurera iritsi zara, duin eta umil. Esango dute lana kentzera zatozela, esango dute gure ondasunak lapurtu nahi dituzula, gure emakumeak bortxatu, esango dituzte hainbeste gauza… Horrelaxe jokatzen dugu azal zuridunok; egunero zuen lurra ustiatzen eta gure mugetan harresi sendoagoak jartzen. Diskurtso populistek eta xenofoboek kolpatzen zaituztete zoazten herrialdera zoaztela. Ez zaizue lekurik uzten, espazioak jabea balu bezala. Pertsona izateko eta pertsona moduan tratatua izateko garrantzitsuena nongoa zaren izango balitz bezala.
Giza eskubideak datozkit burura, zurekin etengabe urratu direnak.
1. artikulua. Gizon-emakume guztiak aske jaiotzen dira, duintasun eta eskubide berberak dituzte; eta ezaguera eta kontzientzia dutenez gero, elkarren artean senide legez jokatu beharra dute.
Ulertu nahi dut zure bidaia, zure ametsak partekatu, baina azal zuri honek ez dit uzten. Zure bizitza gazteak nik sekula ezagutuko ez ditudan astinduak bizi izan ditu dagoeneko. Eta zure bidaia ez da bukatu oraindik. Bazatozte eta bazoazte, olatuen dantzan. Itsasoak irensten zaituzte behin eta berriro. Mediterraneo eta Egeo itsasoak, ozeano Atlantikoak… Bidasoaren bi ertzetan ere 9 gazte hil dira azken urteotan muga zeharkatu nahian. Baina mundua ez da iraultzen heriotza beltzekin.
Orain, hauteskundeak ate joka ditugunean, pertsona migratzaileen ezohiko erregularizazioa arautzen duen dekretua indarrean dago. Baliteke zuk ere eskaera aurkeztu eta tramiterako onartua izana. Esperoan zaude. Urtebetez geurean geratzeko aukera da zure itxaropena. Hemen gaude gu paparra puztuta, gure buruari sinetsaraziz zeinen eskuzabalak garen hamabi hilabeteko lasaitasuna oparituko dizugulako; beharbada. Urtebete barru zer gertatuko zaizun ezer gutxi axola zaigu.
Eta jakin berri dugu Bizkaian eta Gipuzkoan ibili dela talde kriminal bat pertsona migratzaileei iruzur egiten paperak egiten laguntzeko aitzakian. Pack bat eskaintzen zuten 5.000 eta 10.000 euro bitarteko kopurua ordainduta. Lehenago ere ikusita gaude Bidasoako ertzetan mafiosoek nola erabiltzen duten pertsona migratzaileen premia mugaz bestalde pasa eta dirua eskatzeko. Hor tartean bururatzen zait galdera esanguratsu bat; zerk edo nork bultzatzen du pertsona anker horien negozio egarria?
Eta bitartean zure etxean zain daude, zuk noiz oihukatuko «Boza!», jakiteko iritsi zarela helmugara. Bizitza krudel honetako heroia zara eta nire super botere zuriak eman nahi nizkizuke.
