Holaxe daude kontuak
Goizean leihoa zabaldu eta zerua lainotuta ageri da. Hori ikusita, «eguraldi tristea dugu» esango genuen iaz. Orain, ordea, bero-sapa egunak bizi ondoren: zerua lainotuta, urdin gunerik ez eta 25 graduko tenperatura, zorion printza iruditzen zaigu. Hala ere batzuek esango dute ez dagoela klima aldaketarik, mandatariek egingo dituzte goi bilerak eta akordiorik ez ezertan; ekonomia denaren gainetik. Jarraituko dute errepideek autoz gainezka, supermerkatuek plastikoz beteta, ez dadila erori kontsumismoa.
Selektibitateko euskara proban zero biribila atera zuten hainbat ikaslek, gehienak A eredukoak. Haien gurasoek helegitea jarri eta epaileak bota du; euskaran lortutako nota ez kontuan hartzeko batez bestekoa egiteko orduan eta Euskal Herriko Unibertsitateak haientzako lekua bermatzeko, ikaspostu gehiago sortu behar baditu ere. Eta gero esango dute euskara babesten dutela. Euskara ereduen auzia mahai gainean, berriz ere.
Topoan ibiltzen naiz maiz. Bi pasio ditut garraio publikoan bidaiatzen dudanean; lasai irakurtzea eta jendeari begiratzea. Oraindik ikusten ditut liburu bat esku artean bakar batzuk, beste guztiak, begiak mugikorraren pantailari lotuta, gazteak eta ez hain gazteak. Altxa Burua programa abian da gaztetxoak ohartarazteko. Eta besteontzat?
Gerra ugari indarrean munduan zehar; Ukrainan, Palestinan, Iranen, Sudanen… eta Europa beste alde batera begira. Hori bai, pertsona migratzaileak atxilotzeko eta beste herrialde batean eraikitako atxilotze zentroetara bidaltzeko, horretarako bai, lortu da akordioa.
Venezuela gogor zigortu du lurrikara bidegabe batek. Lehen zapalduta eta orain birrinduta. Zenbat izerdi, odol eta negar.
Baina udan gaude, festak nonahi, joan dira San Juanak, San Martzialak, hemen dira sanferminak, Karmengo jaiak, madalenak, Santio eta San Inazio, xanistebanak… Eta jakina, festa giroa eta alkohola barra-barra. Gure seme-alabak gazteak direnean kezka handia izaten dugu drogak ez ditzan tentatu. Baina alkohola beste kontu bat da, sozializatzeko eta ondo pasatzeko ezinbestekoa antza, hala ikusi gaituzte helduok ospakizun guztietan. Umetan alkoholaren inguruan betiko leloa; «Ezin duzu edan 18 urte bete arte, gero gerokoak«.
Eta nola ez, Munduko Futbol Kopa, estadioak bete jende, tartean euskal selekziorik ez, FIFAk ez du onartzen herrialde bat garenik, eta bitartean Anoetak eta San Mamesek 2030erako hautagaitza bateratua aurkeztu dute. Baten bat poztuko da agian, baina euskaldun asko jo eta ma gaude.
Dena den, barka, irakurle, orain ere gehiegi hitz egiten ari naiz; alkohola eta futbola ukiezinak dira.
