Lehentasuna Herria egitea bada... Bai, posible da
Orria handi gelditu zait aldi honetan. Ez dakit gertatzen ote zaizun, baina niri batzuetan bai. Hamarnaka ideia buruan bueltaka, baina bakar bat ere ez aski egokia, ustez, hona ekartzeko. Hatzek, ordea, dantzan segitzen dute. Euskal Hiri Elkargoaren osaketa, udako oporrak, Herri Urrats…
Senpereko aintziraren inguruan elkartuko gara maiatzaren 10ean. Euskararen aldeko besta nazionala izan dadin nahiko lukete antolatzaileek. Aurkeztu dute afitxa, eta adin guztietako jendea gogotsu hurbiltzeko modukoa da. Ez da deus eskas!
Askorentzat uda hurbiltzen ari dela oroitarazten duen hitzordua da, aro txarra tarteko, behin baino gehiagotan bertan behera gelditu bada ere. Baina gehiagotan hartu izan dugu eguzki kolpe bat eta udako planak egiten hasi.
Aurten, gainera, lehendakari ezkertiar eta abertzale bat bertarako du lehen aldiz. Bestaren barne antolaketa barrutik ezagutzen duena dudarik gabe. Senpereko auzapeza ere berria da. Hau ere, ezkerrekoa eta abertzalea.
Aurtengoan Seaskaren bigarren lizeoaren aldeko dirua bilduko da. Orain dela urte batzuk inork ez zuen pentsatu ere eginen, lurralde eremu honetan, murgiltze ereduan jarduten duten bi lizeo egonen zirenik. Ez. Baina ez genuen sekula ere pentsatuko, lehendakari euskaldun, abertzale eta ezkertiarra ukanen genuenik. Batzuetan pentsatu izan dut esperimentaziorako, saiakera berrietarako eta zergatik ez, garaipen ezberdinak dastatzeko ere, eremu interesgarria dela Bidasoaren alde hau.
Egiari zor, iruditzen zait beste aldeko aldean gertatu izan balitz, zuenean alegia, lehendakari ezkertiar eta abertzale baten garaipenagatik askoz ere poz eta zalaparta gehiago sumatuko zela, genuela, litzatekeela. Hori da, ordea, gaur egun dugun egoera. Erronka. Eta Herri Urratsek ematen digu horretarako aukera paregabea! Elkartzeko, hitz egiteko, elkar ezagutzeko… Eta bai, Peio Etxeleku Kanboko EAJko alkate berriaren babesak ireki zion Alain Iriarti lehendakari aginterako atea (EH Bai). Keinua iparraldeko testuinguruan ulertu behar zela azkar, oso azkar argitu zuten EAJko agintariek. Bai, hemengo testuinguruan ongi ulertzen da. Borondatea dagoela eta elkar ulertzen ikasi dugulako.
Baina posible, edozein testuingurutan da posible borondatea eta lehentasuna Herria egitea badira. Kito. Esan dut esan nahi nuen. Kendu zait barne korapiloa eta buruko lainoa. Hots, mintzatu naiz Elkargoaz, Herri Urratsez eta gutxi bada ere, baita udaraz ere.
