Gutuna: "Igor Enparan alkateak irailaren 10eko gertakarien harira adierazitakoari erantzunez"
Irailaren 10ean bi gazte atxilotu zituzten Hondarribiko jaietan, pankarta bat jartzeagatik eta bengala pare bat pizteagatik. Horren harira, udalak hainbat adierazpen eman ditu hedabideetan zein jaien inguruan egindako balorazioan. Horren harira, Bidasoko GKSk gutun bat bidali du HITZAra:
Irailak 10eko gertakarien harira Igor Enparan alkateak egindako adierazpenen aurrean:
Udaltzainen kudeaketa kaxkarra estaltzeko, gertatu ez zen sute batean jarri dute begirada. Alabaina, inguruan zeuden hamarnaka pertsonek argi ikusi zutena zera izan zen: GKSko kide batzuek pankarta bat zabaldu zuten, bengala pare bat piztuta (inork ezin du esan halakorik inoiz ikusi ez duenik). Hauek, bere burua identifikatzeko asmoz, eskaileran behera egin ahala, udaltzain batek eskailera indarrez hartu, astindu, eta lehenbiziko kideari bultzaka, jaistea eragotzi nahi izan zion. Alkatearen hitzetan, ekintza egiten ari zirenen eta inguruan zegoen jende mordoaren segurtasunerako ekinean zebiltzan udaltzainak; ba, segurtasuna bermatzeko modu xelebrea, zinez.
Bigarren ekintzailea lepotik heldu eta hormaren aurka bultzatu zuen zerbitzuz kanpo, parrandan, zebilen ertzain batek. Hori aipatzea ere ahaztu zaio alkateari. Bi kideak atxiki eta Itsas Etxeko arkupetara eraman zituzten. Denbora luzez izan zituzten hor, eta gainera, arrazoi argirik gabe, udaltzain berri bat agertu zen eta eskuburdinekin lotzeko agindu zuen. Bide batez, nor gogoratzen zen suteaz momentu hartan? Ertzainen dispositibo erraldoia agertu zen (denok ikusi ditugu irudiak), eta bi kideak eskuburdinekin eraman zituzten komisariara. Hau da, identifikazio soil bat izan zitekeen hura kaosa bilakatu zen; zergatik eta udaltzain batzuen arduragabekeriagatik.
Izan ere, Hondarribiko hainbat eta hainbat udaltzainen handinahia eta jarrera harroputza denok ezagutzen dugun arazoa da; aspalditik dator eta Udaletxean bertan oso kontziente dira. Baina alkateak nahiago izan du haien bertsioa baldintzarik gabe babestu eta haien lana “goraipatu”. Ez du ezta atxilotuak izan diren GKSko kideekin kontaktuan jartzeko eta euren bertsioa entzuteko keinua ere egin. Ez alkateak ezta zinegotzi bakar batek ere, ezezagun hutsak izango balira bezala. Gero, herriko jaiak posible egiten dituzten “eragile sozial guztiak” eskertzen entzun behar ditugu. Herri honetan hainbat eta hainbat iniziatiba sozialetan ekarpena egiten duten kide hauenganako aitortza falta galanta da hau, gure iritziz. Ez dezagun ahaztu auziperatuak izateko arriskuan daudela.
Non gelditu da Gaztetxeko desalojoan Ertzaintzaren jardunbidea gogor kritikatu zuen alderdi hura? Edota pandemia garaian Udaltzaingoaren ‘gehiegikeriak’ salatu zituena? Alkatearen adierazpenak berdin izan zitezkeen Igor Enparan edo Txomin Sagarzazurenak. Apoa irentsi eta segi aurrera.
Sinatzailea: Patxi Muñoz Ancisar, Hondarribiko GKSko kidea.
