Gutuna: "Bidasoa ESIko beste zerbitzu baten hondoratzea... Larrialdi zerbitzua norabiderik gabe doa"
Bidasoa ESIko Larrialdi Zerbitzuko medikuek zerbitzuaren gaur egungo egoera azaltzeko gutuna helarazi diote HITZAri. Bidasoa ESIa egoera kezkagarrian dago, eta larrialdien zerbitzuko langileek bizi dutena salatu dute enegarrenez.
Hona hemen Bidasoa ESIko Larrialdi Zerbitzuko medikuek HITZAra bidalitako gutuna.
Testu hau sinatzen dugun Bidasoa ESIko Larrialdi Zerbitzuko medikuok, betebehar moral bat sentitzen dugu zerbitzuaren benetako egoera azaltzeko, bai Zuzendaritzaren baita Osakidetzaren beraren pasibotasunaren eta aurreikuspen faltaren aurrean ere. Gure kezka zuzenean lotuta dago herritarrei eskaintzen diegun osasun-arretaren kalitatearekin, eta horregatik beharrezkotzat jotzen dugu egoera hau partekatzea eta iritzi publikoari helaraztea.
Larrialdi Zerbitzua egunean artatu beharreko paziente kopuru jakin bati behar bezala erantzuteko diseinatuta dago. Azken urteotan, pazienteen kopurua pixkanaka handitzen joan da, eta horrek plantilla berrantolatzea ekarri zuen: egunez 5 mediku eta gauez 2 izateko, guztira 20 langileko plantilla batekin. Hala ere, profesional faltaren ondorioz, gaur egun 4 baja luze ordezkatu gabe ditugu, baita adingabeen zaintzagatik emandako 3 lanaldi-murrizketa ere. Horren ondorioz, egun askotan egunez 3 mediku baino ez gara izaten (horietako batzuk esperientzia gutxikoak edo txandak egiten dituzten kanpoko profesionalak), eta gauez 2. Horrek derrigorrezko txanda-aldaketetara jotzera behartzen gaitu, askotan oso aurrerapen gutxirekin jakinarazita, eta horrek zaildu egiten du beharrezkoak diren eta legez ezarrita dauden atsedenaldiak benetan betetzea.
Azken 3 urteetan, aparteko txandekin estaltzen aritu gara murrizketa batzuk eta ustekabeko ausentziak. Horri gehitu behar zaio 3 profesionalen ihesa, gure ustez lan-baldintzek eta Pediatriako Larrialdien itxierak eragindako estresak bultzatuta. Gaur egun, taldea erabat nekatuta eta motibaziorik gabe dago; horrek zerbitzuaren jasangarritasuna arriskuan jartzen du eta eskaintzen dugun arretaren kalitatean eta segurtasunean eragin negatiboa dauka.
Gure arreta-lana 24 ordura arteko txanda luzeetan egiten dugu, eta horrek alerta-maila handia mantentzea eskatzen digu, egoera larrian edo kritikoan dauden pazienteak artatzeko, baita kudeaketa konplexuko gaixo anitz dituzten pazienteak ere.
Azken hilabeteetan zerbitzura etorri den edozein paziente konturatu ahal izan da itxaronaldi luzeak daudela; egoera horrek deshumanizatu egiten du pazienteak sufrimendu eta zaurgarritasun uneetan merezi duen arreta.
Badakigu ez garela hondoratzen ari den sistema baten biktima bakarrak; hala ere, Zuzendaritzaren geldotasunak kezkatzen gaitu, eta horregatik informatu nahi genituen bai beste zerbitzuetako lankideak baita Bidasoako eskualdeko herritarrak ere. Herritarrek beren benetako beharretara egokitutako Osakidetzako osasun-zerbitzuen antolaketa behar dute, eta ez zerbitzu eta prestazioen etengabeko murrizketa.
Benetan kezkatuta eta nekatuta gaude.
Sinatzaileak: Maia Bernad Barcos, Ibai Mauduit Aznar, Miren Arbulu Zanguitu, Carlos Pardo Rodriguez, Ana Lucia Rengifo Martinez, Ion Koldobika Iribar Dieguez, Giovanna Ruiz Hernandez, Mikel Fernandez Ormazabal, Irati Aristegi Sanchez, Irati Lanceta Barandiaran, Ane Etxeberria Fulgencio, Gabriela Gabilondo San Juan, Maria Gomez Martinez, Endika Felix Egia Mokoroa, Xabier Vazquez Albisu, Iker Guariste Vilchez, Juan Morillo Montañes. Bidasoa ESIko Larrialdi Zerbitzuko medikuak.
