Bertso sorta: "Bidasoaldeko autobusaren aldaketak"
Josu Salegi hondarribiarrak, Gipuzkoako Foru Aldundiko Mugikortasun eta Garraio departamendutik Bidasoaldean egingo dituzten autobusen aldaketak direla medio, bertso sorta bat prestatu du eta HITZAra bidali du, protesta gisa.
“Zazpi bertsoko sorta honetan adierazten da aldaketa, kasu gehienetan, okerrerako dela hondarribiar askorentzat, egunerokoan dabiltzan langile edo ikasle askorentzat kalterako izango baita. E20 kenduko da, eta E21aren frekuentzia murriztu. E15ak ere galera izango du ordu jakin batzuetan eta Hondarribitik Donostiara doan herriz herriko autobusak ordubete eta zazpi minuturaino behar izango ditu ibilbide guztia betetzeko. Nahiz eta Donostiako ospitalera, Miramonera eta aireportura zerbitzuak hobetu, linea estrukturalak, jendearen egunerokoan eragin handienak dutenak, kaltetuta geratzen dira”, azaldu du, sortaren atariko bezala, Salegik.
Hona hemen hondarribiarraren sorta:
Bidasoaldeko autobusaren aldaketak
Doinua: ‘Frantses euskaldun bat etorri zait’
1.
Bertso sorta honekin nahiko nuke
protesta bat egitea
Bidasoako autobusekin
egin dute nahastea,
Foru Aldundiak iraultza bat
nahi omen zuen hastea,
Hondarribian askorentzako
tristea den albistea.
2.
Foru Aldunditik egin duten
ordutegi aldaketa,
hitz ederrekin nekez saltzen da
horrelako murrizketa,
leku onean utzia dute
bezeroaren arreta,
lehen zegona hobea bada
aurrerapenikan ezta.
3.
Hondarribitik Donostiaruntz
baldin bazoaz goizero,
autobusa izango zenun
hiru ordu laurdenero,
orain ordea luzatu dute
aukera ordubetero,
ordu libreak alperrik dira
bidean galdu ezkero.
4.
Aireporturako zerbitzua
omen digute hobetu,
turista denak txaloka dira
ezin dutela sinistu,
maletaz autobus bat beteta
egingo nuke apustu
lanerakoan eserlekuan
baietz maletak aurkitu.
5.
Denboran errekor bat hautsi da
jartzen bagera begira,
Hondarribitik baldin bazoaz
herriz-herri Donostira
herri gehiago bildu ezkero
lineak soberan dira
topoa ere jeitsi zazute
nahi baduzute erdira.
6.
Irun Hondarribi artekoak
izan du bere galera,
sasoi ona baldin bazaude
zoaz oinez Irunera,
bestela bizikleta hartuta
auto artean aurrera,
geltokian zain egon ezkero
noizbait iritsiko zera.
7.
Hobekuntzaren izenarekin
guzti hau bataiatzea,
egokiago esan dezagun
guri ilea hartzea,
zerbitzua hobetu nahi bada
ez al da hobe jartzea?
edo bestela, gutxienean
dagoena ez kentzea.
