Adrian Arruti Bernadet: 'Bertso-sorta hau ere heldu da'

Irunabar Irungo Bertsoaren Bilgunearen eta HITZAren elkarlanaren harira, Adrian Arruti Bernadetek bertso sorta egin du. Hona hemen, Arrutik egindakoa:

Bertso-sorta hau ere heldu da

Doinua: ‘Sentimendu asko dauzkat nirekin’

1.

Bertso-sorta hau ere heldu da,

beste guztien gisara,

kanpai hotsaren soinu ozenak

deitzen du ehorzketara.

Sorta azalpen-bertso batekin

abiatu behar bada,

Hitzari egin diodan azken

entrega hau, beharbada,

sortzaile baten heriotzaren

iragarpen kronika da.

 

2.

Zer da esan nahi nukeen hori?

Zer da esan behar dena?

Gogaigarri zait hitz-hartzearen

gurutze-bide zekena!

Egin ditudan bertso-sortetan,

urte hauetan barrena,

idatzi ezin izan dudana

da adierazgarriena

eta idatzi dudana ez da

adierazi nahi nuena.

 

3.

Dekadentzia protagonista

egin den agerraldian

ez da porturik nora itzuli;

ez da itzalik argian.

Iparrorratzak iparrik ez du

aurkitu azken aldian,

nori edota zeri idatzi

aritu naiz aspaldian

heldulekurik ezin bilatu

nabilelako, agian…

 

4.

Mundutik nire baitara doan

berotegi efektuak

neuzkan ideien iturburuak

utzi ditu idortuak.

Nihilismoak ebatsi dizkit

nituen heldulekuak

NItik arituz GUa ez ote

du irentsi ezlekuak…

agian oso urrun joan naiz

sortu nahian NItik GUak.

5.

Inoiz federik izan ez duen

abadea otoitzean,

alkohol idorra eta zigarro

biharamuna goizean,

narda puntua bikotearen

musuetara ohitzean,

korapilo bat ahots-kordetan

bertso berri bakoitzean…

esanahietik esan nahiera

Ulises naiz Odisean.

 

6.

Mendian gora Sisifo edo

eguzki bila Ikaro

sortak idazten kalbariotik

gehiegitan naiz igaro.

Saiatu erruz saiatua naiz;

jada ezin dut gehiago.

Orain bezala jarraitzekotan,

bukaera argi dago…

epikoa ez izanagatik

asumitzeko prest nago.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.