Txingudi Errugbi Taldearen larunbateko partidak, hemen
Zaisa Txingudik Iruña Errugbi Taldea hartuko du Plaiaundin, 14:30ean. Biok Txingudik, berriz, Uribealdearen aurka jokatuko du, Plaiaundin ere, 16:30ean.
Zaisa Txingudi eta La Unica taldearen arteko partida, orain bi aste. Yaiza Rodriguez, Txingudi Errugbi Taldea Asteburu berria, eta harekin, aukera berriak. Senior gizonezkoak pasa den asteko hutsegitea gainditu eta irabazteko gogoz irtengo dira zelaira larunbat eguerdian. Senior emakumezkoak, berriz, aurreko asteko garaipenaren zapore gozoarekin ekingo diote jardunaldi berriari. Biek ala biek, etxean hartuko dituzte aurkariak, Plaiaundiko zelaian.
Zaisa Txingudiko gizonezkoek 40-39 galdu zuten pasa den astean Uni Bilbaoren aurka, Errekalden (Bizkaia) jokatutako partidan. Gutxigatik egin zien ihes garaipenak, eta emaitza hori aldatzeko asmotan irtengo dira bihar zelaira. Iruña Errugbi Taldearen aurka lehiatuko dira, 14:30ean. Aurkari zaila dute biharkoa, azken bi partidak irabazita, talde nafarra bigarren doalako sailkapenean.
Biok Txingudi emakumezkoen taldeak 16:30ean jokatuko du, Uribealdearen aurka. Pasa den astean etxeko taldeak Hernaniri 41-39 irabazi zion. Denboraldiko lehen garaipen horri esker, etxeko neskek lau puntu eskuratu zituzten, eta Uribealdea taldeak bi puntuko aldea besterik ez die ateratzen.
Harrobiaren partidak
Txingudi Errugbi Taldeko gaztetxoenak ere prest dira astebururako. Sub 16 eta sub 18 taldeek Getxon (Bizkaia) dute partida, bertako B taldeen aurka. Zehazki, sub 16 taldeak 14:15ean jokatuko du, eta sub 18k, berriz, 15:45ean. Ikusteke dago zein izango den emaitza, baina oraingoz harrobiko bi taldeak indartsu ari dira, eta Euskal Txapelketetako lehenengo mailetara sailkatzeko aukerak dituzte.
