Gazteak On: Elikadura Erronka lehiaketa berria aurkeztu dute
Proiektuak baliabide hezitzaileak eskaintzen ditu gazteek elikadura jasangarria lantzeko. Aurten, nobedade gisa, plataforma bat sortu dute.
Gazteak On hezkuntza plataformak etorkizun jasangarriago baten alde egiten du. Herriko hainbat elkarte daude plataformaren barruan: Maïa Permaculture, Labore Txingudi, Hendaiakoop eta Ara!Gorputz kooperatiba. Etorkizun jasangarriago baterako bidean, plataformak elikadura jasangarriaren garrantzian jartzen du fokua.
“Elikadura ez da soilik jaten duguna: gure osasunarekin, ingurumenarekin, ekoizpen-moduekin, tokiko ekonomiaren bizitasunarekin eta pertsonen arteko harremanekin lotuta dago”, azpimarratu du plataformak. Elikadura sistema eraldatzeko, plataformak bi urte daramatza hezkuntza sistemarekin elkarlanean, gazteen artean elikadura jasangarria lantzeko. Horixe bera da Elikadura Erronka Lehiaketaren helburua.
Lehiaketaren bitartez, gazteek elikaduraren inguruan hausnartzen dute. Elikadura sistemaren barruan egon daitezkeen arazoak atzemateaz gain, ikasleek horiek konpontzeko irtenbideak planteatzen dituzte. Hala, lehiaketak taldeko lana, sormena, ikus-entzunezko komunikazioa eta gazteen parte hartzea sustatzen du.
Lehiaketaren hirugarren edizioan parte hartzeko izena emateko epea gaur ireki da, hilak 13, eta 2027ko urtarrilaren 31ra arte dago zabalik. Ondoren, bideoak aurkezteko epea otsailaren 1etik apirilaren 9ra arte izango da. Proiektuak aztertu eta herritarrek bozkatu ostean, ekainaren 4an jakinaraziko dira saridunak. Lehiaketaren xehetasunak plataformaren webgunean daude.
Berritasuna
Bi urtez lehiaketa antolatu eta gero, aurten berritasun bat aurkeztu du plataformak. Elikadura jasangarria lantzeko plataforma bat eratu dute, gazteen esperientziak eta hezkuntza komunitatearen arteko harremana partekatzeko.
Plataformaren bitartez, asmoa da aurrerantzean eskura egotea ikasgeletan elikadura lantzeko eduki zein baliabideak. Irakasleekin izandako lan-saioen ostean ondu dute plataforma.
