Cristina Laborda, Irungo PSE-EEren alkategai
"Nire bizitza hiri honi eskaintzen eta bertako bizilagunen alde lanean jarraitzen eman nahi dut", adierazi du Labordak
Irungo PSE-EEk iragarri du Cristina Laborda izango dela sozialisten zerrendaburu 2027ko maiatzaren 23ko udal hauteskundeetan. “Irungo alkate izatea nire bizitzan izan dudan pribilegiorik handiena da. Irun nire etxea da, nire historia eta nire pasioa. Nire bizitza hiri honi eskaintzen eta bertako bizilagunen alde lanean jarraitzen eman nahi dut”, adierazi du Labordak. Irunen izaera eta nortasun propioa nabarmendu ditu, baita hiria ezagutzearen, maitatzearen eta sentitzearen garrantzia ere hiriaren buru izaterako orduan.
Egungo alkateak udal esperientzia eta gaur egungo Irun eraikitzen lagundu dutenen ondarea nabarmendu ditu. “Historia kolektibo baten parte naizela sentitzen dut, eta oso presente dut dagokidan erantzukizunari behar bezala erantzuteko ardura. Konfiantza egunero irabazten da, lan eginez, herritarrei entzunez eta haien beharrei erantzunez”, adierazi du. Ildo horretan, “gertutasunean, entzute aktiboan eta konponbide zehatzak bilatzean” oinarritutako politika egiteko modua defendatu du.
Labordak ziurtatu du Irunek erronka garrantzitsuak dituela aurretik eta horiei aurre egiteko proiektu argia duela, Via Irun edo etxebizitza arloetatik hasi eta “kulturaren, segurtasunaren eta auzoen zaintzaren” sustapenera arte: “Asko dago egiteko. Etorkizunari anbizioz begiratu behar diogu, Irunen interesak gainerako erakundeen aurrean defendatu eta, aldi berean, eguneroko kezkei erantzuteko. Irunerako proiektu bat dugu, eta hura egi bihurtzeko erabakia”.
“Iruneko alkate izatea ez da nolanahiko ardura. Badakit zer esan nahi duen erantzukizun horrek, eta oso serio hartzen dut. Horregatik jarraitu nahi dut: Irun maite dudalako eta haren etorkizunaren alde lanean jarraitzeko esperientzia, ilusioa eta gogoa ditudalako”, adierazi du Labordak. Halaber, talde handi baten babesa duela jakiteak ematen dion konfiantza nabarmendu du. “Talde horrekin aukerak eskaintzen dituen, pertsonak zaintzen dituen eta bere nortasuna eta interesak defendatzen dituen hiria eraikitzen jarraitzeko konpromisoa partekatzen dut”.
